ԵՐԵՎԱՆ, 6 ապրիլի — Sputnik. «Տվյալ իրավիճակում ԼՂ պաշտպանության բանակի շտաբի պետի մակարդակով մասնակցությունը մարտական գործողությունների այս դժվարին պայմաններում նպատակահարմար չէր»,- այսօր ԱԺ-ում, պատասխանելով ՀՀ ԱԺ պատգամավորների հարցերին, ասաց ՀՀ ՊՆ Սեյրան Օհանյանը։
«Միջնորդավորված առաջարկությամբ այսօր մենք հասել ենք նրան, որ կրակը ժամանակավորապես դադարեցված է»,- նշեց նախարարը` ավելացնելով, սակայն, որ այս կերպ Ղարաբաղը դուրս չի մնա բանակցային գործընթացից։
«Բոլորիս համար հասկանալի է, մենք բոլորս ձգտում ենք, որ ԼՂՀ-ն` որպես բանակցային կողմ, մաս կազմի նաև բանակցային գործընթացին»,- ասաց նա։
Անդրադառնալով ղարաբաղա-ադրբեջանական սահմանին հաստատված հարաբերական անդորրին, Սերյան Օհանյանը հայտնեց, որ այն օգտագործվում է «համապատասխան հետևություններ անելու, առաջիկա գործողություններին նախապատրաստվելու համար»։
Ապրիլի 1-ի լույս 2-ի գիշերը ղարաբաղա-ադրբեջանական հակամարտ զորքերի շփման գծի ողջ երկայնքով Ադրբեջանի կողմից սանձազերծված ագրեսիվ գործողություններն ուղղված էին ոչ միայն զորամասերի, այլև խաղաղ բնակիչների դեմ։ Ապրիլի 5-ին` տեղական ժամանակով ժամը 12։00-ին ղարաբաղյան հակամարտության շփման գծում երկու կողմերից կրակոցները դադարել են։
