ԵՐԵՎԱՆ, 6 ապրիլի — Sputnik. Լայնածավալ պատերազմական գործողությունների իրականացումը նշանակում է, որ Ադրբեջանը նախապես պատրաստված է եղել հարձակմանը։ Բայց հայկական զինուժի համար էլ այս հարձակումն անսպասելի չի եղել։ Հետախուզական աշխատանքների շնորհիվ հակառակորդի կազմը, հնարավոր գործողությունները նախապես հայտնի են եղել։
«Պարզապես նման դիվերսիոն գործողություների, պարբերական հարձակումների առկայության պայմաններում շատ դժվար է որոշել, թե հատկապես որ ուղղությամբ կարող են լինել հարձակումներ, մանավանդ որ գործը լայնամասշտաբ, դասական ոճի լայնածավալ գործողություների մասին չէ»,- ասաց Սեյրան Օհանյանը։
Այդուհանդերձ, նախարարի խոսքով, ԼՂՀ Պաշտպանական բանակը կարողացել է ամբողջ ծավալով դիմագրավել այդ հարձակումը և տալ արժանի հակահարված, որի վկայությունն է նաև շփման գծի երկայնքով թշնամու թողած դիակների առկայությունը։
Սեյրան Օհանյանը նշեց, որ բանակի հաջողությունները նաև նրա ունեցած տեխնիկայի ճիշտ օգտագործման շնորհիվ էր, որը թեև զիջում էինք թվաքանակով, բայց Ճշգրիտ կրակային խոցումների շնորհիվ կարողացավ կործանել ադրբեջանցիների զինտեխնիկայի ու կենդանի ուժի մեծ քանակություն։
Այս պարագայում Սեյրան Օհանյանը կարևորեց ՀՀ-ում ռազմական արդյունաբերության ոլորտի զարգացման անհրաժեշտությունը։ Նա տեղեկացրեց, որ ստեղծվել է ռազմական արդյունաբերության կոմիտե, որն այդ ուղղությամբ աշխատանքներ է իրականացնում` մշակելով նոր ռազմական տեխնոլոգիաներ, որոնց արտադրության ու ներդրման համար ֆինանսական հատկացումներ են կատարվել ՀՀ պետական բյուջեից։
