ԵՐԵՎԱՆ, 6 ապրիլի — Sputnik. Հայաստանի օրակարգում միշտ եղել է Ղարաբաղին բանակցային կողմ դարձնելու խնդիրը, և վերջին իրադարձությունները ևս մեկ անգամ շեշտեցին դրա կարևորությունը, կառավարության նիստից հետո հայտնեց ՀՀ ԱԳ փոխնախարար Շավարշ Քոչարյանը։
«Ղարաբաղի ներգրավումը բանակցություններում այլընտրանք չունի թե´ այն առումով, որ կանխվեն ապագա սադրանքները, թե´ բուն բանակցային գործընթացում առաջընթաց արձանագրելու տեսակետից»,- ընդգծեց Քոչարյանը։
Քոչարյանի խոսքով` Հայաստանի ռազմական փոխօգնության պայմանագիրը ԼՂՀ-ին գտնվում է համաձայնեցման փուլում` և´ Հայաստանի ներսում գերատեսչությունների միջև, և´ Ղարաբաղում։
«Պայմանագրի ստորագրումը պայմանավորված է նրանով, որ մենք համաձայնեցնենք տեքստը, այն ստորագրենք, որից հետո կարելի է խոսել վավերացման մասին»,- նշեց փոխարտգործնախարարը։
Ըստ նրա` պայմանագիրն այն փաստաթուղթն է, որն ընդգծում է Հայաստանի հարաբերությունները Լեռնային Ղարաբաղի հետ` հիմնված իրավահավասարության վրա։
