ԵՐԵՎԱՆ, 5 ապրիլի — Sputnik. Հաշվի առնելով Լեռնային Ղարաբաղի Հանրապետության և Ադրբեջանի շփման գծում լարված իրավիճակը` Կամերային երաժշտության ազգային կենտրոնը ողջ անձնակազմով նույնպես պատրաստ է սեփական ուժերի ներածի չափով սատար կանգնելու հայրենի սահմանը պահող մարտիկներին ու հակամարտության գոտում գտնվող խաղաղ բնակիչներին, հայտնում են կենտրոնից:
Ազգային կենտրոնի տնօրեն Վաչե Հովեյանի նախաձեռնությամբ երաժշտական 5 կոլեկտիվների՝ Երևանի պետական կամերային երգչախմբի, Հայաստանի պետական կամերային նվագախմբի, Հայաստանի պետական կամերային երգչախմբի, հնագույն երաժշտության «Տաղարան» համույթի, «Հովեր» պետական կամերային երգչախմբի, ինչպես նաև կենտրոնի ադմինիստրատիվ անձնակազմերը՝ ընդհանուր 205 աշխատակից, միասնական հանգանակություններ են կատարել և ստացված գումարը պատրաստվում են ուղարկել Լեռնային Ղարաբաղի Հանրապետության կառավարության կողմից բարեգործությունների համար բացված բանկային հաշվին` հակամարտության գոտում բնակչության կարիքները հոգալու համար:
Բացի այդ, կամերային երաժշտության ազգային կենտրոնի կազմակերպած ապրիլ ամսվա համերգներից գոյացած գումարները նույնպես կուղարկվեն Արցախ:
