ԵՐԵՎԱՆ, 5 ապրիլի — Sputnik. ԱԺ փոխնախագահ Էդուարդ Շարմազանովը ղարաբաղա-ադրբեջանական շփման գծում տիրող հարաբերական անդորրը զինադադար չորակեց:
«Զինադադարը 1994թ-ին է կնքվել, հիմա միգուցե հարաբերական անդորր է, կամ պայմանավորվածություն է ձեռք բերվել, որպեսզի չկրակեն»,- ասաց նա:
ԱԺ-ում ավելի քան 3 ժամ տևած ԼՂ իրավիճակի վերաբերյալ դռնփակ քննարկման ավարտին ԱԺ-ում սպասող լրագրողները հնարավորություն չունեցան իրենց հետաքրքրող հարցերի պատասխանները ստանալ քննարկմանը ներկա ԱԳ և պաշտպանության փոխնախարարներից:
Փոխարենը լրագրողների հետ ճեպազրույցում ԱԺ փոխնախագահ Էդուարդ Շարմազանովը տեղեկացրեց, որ պաշտոնյաները պատասխանել են պատգամավորների ավելի քան 45 հարցի: Թե ինչ հարցեր ու պատասխաններ են հնչել, Շարմազանովը չբացահայտեց, բայց ասաց, որ բավարարված են հատկապես Պաշտպանության փոխնախարար Դավիթ Տոնոյանի ներկայացրած տեղեկություններից:
«Որովհետև խնդիր կա մեր գործընկերներին ցույց տալու, որ Ադրբեջանն ագրեսոր է, ահաբեկչական երկիր է, և Թուրքիայի օժանդակությամբ անում է քայլեր, որոնք դեմ են ոչ միայն զինադադարին, այլև միջազգային իրավունքին,- ասաց նա՝ հավելելով,– մենք ստացանք որոշակի լուրջ փաստեր:
Էդուարդ Շարմազանովը ոչ հերքեց, ոչ էլ հաստատեց հայկական կողմի կորցրած դիրքերի ու հենակետերի մասին լուրերը: ԱԺ փոխխոսնակն անպատասխան թողեց նաև հարցը, թե արդյո՞ք այս պահին հայկական ուժերը վերականգնել են ապրիլի 1-ի դրությամբ եղած սահմանագիծը:
