ԵՐԵՎԱՆ, 5 ապրիլի — Sputnik. Ռուսաստանի վարչապետի պաշտոնական այցը Երևան կկայանա նախապես պլանավորված օրը` ապրիլի 7-ին: Հայաստան այցելությունից հետո Դմիտրի Մեդվեդևը կմեկնի Ադրբեջան, հայտնել է վարչապետի մամուլի քարտուղար Նատալյա Տիմակովան։
Անդրադառնալով ԵՏՄ վարչապետների Երևանում կայանալիք գագաթնաժողովին՝ մամուլի խոսնակը լրատվամիջոցին ասել է.
«Մոտ ժամանակներս տեղի կունենա Ռուսաստանի վարչապետ Դմիտրի Մեդվեդևի և իր հայ պաշտոնակից` Հայաստանի վարչապետ Հովիկ Աբրահամյանի հեռախոսազրույցը: Ինչպես սպասվում է, Դմիտրի Մեդվեդևը, հաշվի առնելով ստեղծված իրավիճակը, կտեղեկացնի իր պաշտոնակցին, որ համաձայնել է կազմակերպությունում նախագահող Ղազախստանի առաջարկին` Երևանում նախատեսված ԵՏՄ վարչապետների գագաթնաժողովը հետաձգելու և այն հաջորդ շաբաթ տեղափոխելու ու Մոսկվայում անցկացնելու մասին»։
Ավելի վաղ հայտնի էր դարձել, որ ՌԴ վարչապետ Դմիտրի Մեդվեդևը ապրիլի 7-8-ին կայցելի Հայաստան, որտեղ կմասնակցի երկկողմանի միջոցառումներին, ինչպես նաև ԵՏՄ երկրների վարչապետների նիստին։
