ԵՐԵՎԱՆ, 5 ապրիլի- Sputnik. LifeNews-ում չեն բացառում, որ ադրբեջանական իրավապահ մարմինները խուզարկություններ են կատարել հյուրանոցի համարում, որտեղ ապրել են ալիքի լրագրողները, որոնց երեքշաբթի վտարել են երկրից։
Ավելի վաղ Ադրբեջանի ԱԳՆ մամուլի ծառայության ղեկավար Հիքմեթ Հաջիևը հաղորդել է, որ Ադրբեջանում LifeNews-ի աշխատակիցների գտնվելը «նպատակահարմար չի համարվել»։ Նրա խոսքով` լրագրողները գործել են հանրապետության տարածքում առանց հավաստագրման, և Ադրբեջանի իշխանությունների կարծիքով` ոչ օբյեկտիվ տեղեկատվություն են ներկայացրել։ News Media-ում, որի կազմի մեջ է մտնում LifeNews-ը, ավելի ուշ հերքել են այդ մեղադրանքները։
«Երեկ կանչեցին մեր Ժենյա Զմանովսկայային, երբ նա աշխատում էր, նրան կանչեցին ոստիկանության բաժանմունք, նրան շուրջ մեկ ժամ պահեցին… Հետո պահանջեցին, որպեսզի նա մեկնի Բաքու»,- պատմել է News Media հոլդինգի գլխավոր տնօրեն Անատոլի Սուլեյմանովը։
Նրա խոսքով` ալիքի ղեկավարությունը խորհուրդ է տվել իր թղթակցին մեկնել Բաքու, իսկ ինքը փորձել է որոշել խնդիրը տեղի ԱԳՆ-ի հետ. «Մենք կապի մեջ ենք եղել տեղի ԱԳՆ-ի հետ, շատ հաճախ ենք զանգել, խնդրել մեզ թողնել Լեռնային Ղարաբաղ կամ հնարավորություն տալ աշխատել Լեռնային Ղարաբաղում»։
Բացի այդ, հավելել է Սուլեյմանովը, մինչ լրագրողները հյուրանոցում չեն եղել, դատելով ամեն ինչից, հետախուզություններ են իրականացվել։
«Հյուրանոցում ստուգել են մեր աշխատողների հագուստը նրանց բացակայության ժամանակ։ Նրանք եկան և ասացին. մեր իրերը փորփրել են, մենք մտածեցինք, որ ինչ-որ բան են թողել մեզ մոտ, թափ տվեցինք ողջ հագուստը»,- նշել է նա։
Սուլեյմանովի խոսքով` ըստ էության Լեռնային Ղարաբաղից մինչև Բաքու լրագրողներին մշտապես ուղեկցել են իրավապահ ուժերի ներկայացուցիչները։
