ԵՐԵՎԱՆ, 4 ապրիլի — Sputnik. Ղարաբաղա-ադրբեջանական հակամարտ զորքերի շփման գծում մարտական գործողությունները շարունակվում են, տեղեկացնում է ԼՂՀ պաշտպանության բանակի մամուլի ծառայությունը:
«Օրվա ընթացքում հակառակորդը, բացի նախօրեին գործածության մեջ դրած զինատեսակներից, սկսել է կիրառել նաև սեփական զինանոցում կուտակված «ТОС 1» տիպի ծանր հրանետային համակարգեր, հարվածային անօդաչու թռչող սարքեր ու այլ ժամանակակից զինտեխնիկա: Սակայն այս ամենի արդյունքում անգամ ադրբեջանական զինուժին չհաջողվեց ռազմաճակատում փոխել դեպքերի զարգացման ընթացքը հօգուտ իրեն»,- ասված է ԼՂՀ ՊԲ հաղորդագրության մեջ:
Ըստ հաղորդագրության` ՊԲ բոլոր ուղղությունների ստորաբաժանումները ոչ միայն հաջողությամբ իրենց դրսևորեցին դիրքային մարտերում, այլև գրագետ ու նպատակասլաց գործողությունների շնորհիվ օրվա ընթացքում ոչնչացրին թշնամական 5 տանկ, 3 հարվածային անօդաչու թռչող սարք, տարբեր տեսակի տեխնիկա և տասնյակների հասնող կենդանի ուժ:
ՊԲ-ն չի բացառում, որ հայկական զինուժի այս հաջողությամբ է պայմանավորված Ադրբեջանի ռազմական ղեկավարության կողմից արվող անհավասարակշիռ հայտարարությունները՝ Արցախի Հանրապետության խաղաղ բնակավայրերի և մասնավորապես մայրաքաղաք Ստեփանակերտի ռմբահարման սպառնալիքներով:
ԼՂՀ պաշտպանության նախարարությունը զգուշացնում է Ադրբեջանի ռազմական ղեկավարությանը, որ նման զարգացումների դեպքում արձագանքը լինելու է անհամաչափ և ավելի ցավոտ:
