ԵՐԵՎԱՆ, 4 ապրիլի — Sputnik. Հարևան Վրաստանը մտահոգված է Ղարաբաղյան հակամարտության ակտիվ փուլով։ Նախօրեին Վրաստանի պաշտպանության նախարար Թինաթին Խիդաշելին հեռախոսազրույց է ունեցել Հայաստանի պաշտպանության նախարար Սեյրան Օհանյանի և Ադրբեջանի պաշտպանության նախարար Զաքիր Հասանովի հետ։
«Թինաթին Խիդաշելին հույս է հայտնել, որ ռազմական գործողությունները շուտով կավարտվեն, և գործընթացը լուծում կստանա բանակցությունների սեղանի շուրջ։ Վրաստանի համար կայունությունը տարածաշրջանում կենսական անհրաժեշտություն ունի, և միջազգային հանրությունը պետք է օգտագործի բոլոր միջոցները տարածաշրջանում իրավիճակի կայունացման համար», — Վրաստանի ՊՆ-ի մամուլի ծառայությունը մեջբերում է Խիդաշելիի խոսքերը։
Ադրբեջանի պաշտպանության նախարարությունն իր հերթին այլ տեղեկատվություն է տարածում վրացական և ադրբեջանական պաշտպանական գերատեսչությունների ղեկավարների հեռախոսազրույցի մասին։
«Խիդաշելին և Հասանովը հեռախոսով քննարկել են շփման գծի իրավիճակը։ Զրույցի ժամանակ վրացի նախարար Խիդաշելին նշել է, որ միշտ աջակցել է Ադրբեջանի տարածքային ամբողջականությանը», — փոխանցում է Ադրբեջանի ՊՆ մամուլի ծառայությունը։
Չնայած ադրբեջանական կողմի տարածած տեղեկատվությանը, վրացական կողմի պաշտոնական հայտարարության մեջ չեն եղել Ադրբեջանի կողմից հնչեցված հայտարարությունները։ Վրաստանը նշել է, որ կարող է դառնալ հակամարտության մոդերատոր, քանի որ լավ հարաբերությունների մեջ է ինչպես Ադրբեջանի, այնպես էլ Հայաստանի հետ։
«Ուշադիր հետևում ենք Լեռնային Ղարաբաղի իրադարձություններին։ Մենք սերտ կապեր ունենք ինչպես Ադրբեջանի, այնպես էլ Հայաստանի մեր գործընկերների հետ։ Հուսով եմ` մոտ ժամանակներս կողմերը կդադարեցնեն կրակը և կանցնեն հակամարտության խաղաղ կարգավորման հանգիստ փուլին», — հայտնել է Վրաստանի ԶՈՒ Գլխավոր շտաբի պետ, գեներալ-մայոր Վախթանգ Կապանաձեն։
Լեռնային Ղարաբաղի իրավիճակի հետ կապված` տեղի է ունեցել Վրաստանի վարչապետ Գեորգի Կվիրիկաշվիլու հանդիպումը նախարարների կաբինետի և խորհրդարանական հանձնաժողովի ներկայացուցիչների հետ։ Կվիրիկաշվիլին տարակուսանք է հայտնել հակամարտության սրման հետ կապված։
Հակամարտությունը սրվել է ապրիլի 1-ի լույս 2-ի գիշերը։ Ապրիլի 2-ի, 3-ի, 4-ի առավոտյան Ադրբեջանը մի շարք նախահարձակ գործողություններ է իրականացրել, որոնց ընթացքում հրթիռահրետանային գնդակոծության են ենթարկվել ոչ միայն հայկական զինված ուժերի դիրքերը, այլև խաղաղ բնակավայրերը։
Վերջին պաշտոնական տեղեկատվության համաձայն` Ադրբեջանական ստորաբաժանումները չեն կարողացել կոտրել դիրքերում կանգնած զինծառայողների ոգին, փորձել են ծանր տեխնիկա կիրառել, այդ թվում` ТОС-1 ծանր համազարկային կրակի համակարգեր և ռազմական անօդաչու սարքեր։
