ԵՐԵՎԱՆ, 4 ապրիլի-Sputnik. Լեռնային Ղարաբաղի դեմ Ադրբեջանի ծավալած երկօրյա լայնածավալ ռազմական գործողությունների հետևանքով վիրավորվել է Հայկ Թորոսյանը։ 18-ամյա երիտասարդի վիճակը կայուն ծանր է։ Sputnik Արմենիայի տեղեկություններով` Հայկն ունի գանգուղեղային ներթափանցող վնասվածք։ Մեր թղթակիցը զրուցել է երիտասարդի հոր` Դավիթ Թորոսյանի հետ, որին թույլ էին տվել այցելել որդուն։
«Տղաս անգիտակից վիճակում է, բժիշկներն ասել են, որ Հայկն ամուր օրգանիզմ ունի, դրական տեղաշարժ կա»,-հայտնեց Դավիթ Թորոսյանը։
Նրա խոսքով` բժիշկներն ամեն ինչ անում են տղայի առողջական վիճակը կայունացնելու համար, բժիշկները տղաների հետ վարվում են, ինչպես սեփական երեխաների հետ կվարվեին` նույն հոգատարությամբ ու սրտացավությամբ։
Տեղեկացնենք, որ Հայկ Թորոսյանը վիրավորվել էր Մարտակերտում։ Նրան տեղափոխել էին Ստեփանակերտի հանրապետական հիվանդանոց, այնտեղից էլ` Երևան։
