ԵՐԵՎԱՆ, 3 ապրիլի — Sputnik. Հանդիպման ընթացքում արտաքին գործերի նախարարի տեղակալ Շավարշ Քոչարյանը դեսպանին հայկական կողմի խորը տարակուսանքն է հայտնել Բելառուսի Հանրապետության ԱԳՆ-ի տարածած հայտարարության մի շարք դրույթների կապակցությամբ։
Բելառուսի ԱԳՆ-ն 2016թ.-ի ապրիլի 2-ին Լեռնային Ղարաբաղի շուրջ ծավալված իրադարձությունների վերաբերյալ հայտարարություն էր տարածել և ընդգծել, որ Բելառուսը` որպես ԵԱՀԿ Մինսկի խմբի անդամ, հետևողականորեն կողմ է հանդես գալիս հակամարտության խաղաղ լուծմանը` միջազգային իրավունքի համընդհանուր ճանաչված սկզբունքներին և նորմերին համապատասխան. ամենից առաջ ինքնիշխանության, տարածքային ամբողջականության և պետության սահմանների անխախտելիության ապահովման, ինչպես նաև ՄԱԿ–ի Անվտանգության խորհրդի համապատասխան բանաձևերի և ԵԱՀԿ որոշումների հիման վրա։
Դեսպանի հետ հանդիպման ընթացքում նշվել է, որ նման հայտարարությունը չի համապատասխանում հայ-բելառուսական հարաբերությունների ոգուն և հակադրվում է ՀԱՊԿ ու միջազգային այլ կառույցների շրջանակներում կողմերի ստանձնած պարտավորություններին, վնաս է հասցնում բանակցային գործընթացին՝ խրախուսելով ուժի կիրառումը ԼՂ հակամարտության կարգավորման գործընթացում:
