ԵՐԵՎԱՆ, 2 ապրիլի – Sputnik. «Բաքվի կողմից բանակցային գործընթացի խաթարմանն ուղղված շարունակական քայլերը, իսկ վերջերս Մինսկի խմբի համանախագահների հետ հանդիպումներից հրաժարումը, Ադրբեջանի նախաձեռնած նոր թափով ռազմական գործողությունները, շանտաժի լեզվով խոսելու հերթական ապարդյուն փորձերն են»,- ասված է ՀՀ ԱԳՆ տարածած պաշտոնական հայտարարության մեջ։
Արտաքին քաղաքական գերատեսչությունը փաստում է, որ Բաքուն կոպտորեն ոտնահարում է միջազգային հանրության բազմաթիվ կոչերը՝ հիմնահարցը բանակցային ճանապարհով լուծելու վերաբերյալ, միաժանական հիշեցնելով, որ վերջին օրերին նման նոր հայտարարություններով է հանդես եկել ԵԱՀԿ Մինսկի խմբի համանախագահությունը, ԵԱՀԿ գերմանական նախագահությունը, ԱՄՆ փոխնախագահն ու պետքարտուղարը:
«Ահա, թե ինչպես է Ադրբեջանը պատասխանում նման հորդորներին»,- ասված է հայտարարության մեջ,- «Մենք բազմիցս ենք հրավիրել միջազգային հանրության ուշադրությունը, կոչ արել սանձել Բաքվի ռազմական նկրտումները` աչքի առաջ ունենալով իրավիճակի հենց այնպիսի զարգացումը, որն այսօր իրականացվում է Ադրբեջանի կողմից»:
Իրավիճակի սրման Ադրբեջանի հերթական քայլը, հաշվի առնելով դրա լայնածավալ բնույթը, օգտագործված զինատեսակները, թիրախների ընտրությունը, ԱԳՆ-ի մեկնաբանությամբ, «խոսում է այն մասին, որ Բաքուն գնում է իրավիճակի հետևողական լարման ճանապարհով, ինչը հրամայական է դարձնում Ադրբեջանին կարգի հրավիրելու նպատակով միջազգային հանրության գործնական քայլերի իրականացումը»:
