ԵՐԵՎԱՆ, 2 ապրիլի — Sputnik. Երկրապահ կամավորականների միությունը պատրաստ է 100 տոկոսով կատարել իր պարտականությունները, Sputnik Արմենիա ռադիոկայանին հայտարարեց ԵԿՄ մամուլի խոսնակ Վարդան Վարդանյանը` մեկնաբանելով շփման գծում ստեղծված լարված իրավիճակը:
Նրա խոսքով` ԵԿՄ-ն մտահոգ է իրավիճակով, ինֆորմացիային տիրապետում է, միության ղեկավարն անընդհատ կապի մեջ է Հայաստանի և Արցախի զինված ուժերի գերագույն գլխավոր հրամանատարների և պաշտպանության նախարարների հետ։
«Ամեն վայրկյան ճշտվում է իրավիճակը, և համապատասխան ճիշտ հանձնարարություններ են տրվում երկրապահի կառույցների մարզային խորհուրդներին, տարածքային բաժանմունքներին, ու ԵԿՄ-ն պատրաստ է պարտականությունները լիարժեք կատարել»,- ասաց Վարդանյանը:
Վարդանյանը նշեց, որ միությունը բոլոր սահմանամերձ տարածքներում ունի կառույցներ, բացի այդ բոլոր բաժանմունքները միշտ պատրաստ են, պատերազմի մասնակից երկրապահները հերթապահություն են իրականացնում, անընդհատ լինում են դիրքերում և հենակետերում, քանի որ պատերազմը չի ավարտվել, փխրուն հրադադարի ռեժիմ է, բայց իրենք միշտ էլ պատրաստ վիճակում են, այս պահին` առավել ևս։
Իսկ ԵԿՄ վարչության փոխնախագահ Ղուկաս Ուլիխանյանն ասաց, որ Ադրբեջանն արժանի հակահարված պետք է ստանա, որ հարձակման մտքից հրաժարվի։
«Հայկական ուժերն ի վիճակի են արժանի հակահարված տալ, եթե ի վիճակի չլինեին, թշնամին ավելի շուտ կսկսեր գործողությունները։ Ամեն անգամ արժանի հակահարված ստանալով` նա հետ է կանգնում իր ծավալապաշտական նկրտումներից»,- նշեց Ուլիխանյանը։
