ԵՐԵՎԱՆ, 2 ապրիլի — Sputnik. Երևանում ապրիլի 8-ին նախանշված ԵՏՄ երկրների վարչապետների հանդիպման արդյունքում հայ գործարարները որոշակի նոր արդյունքներ են ակնկալում:
«Մեր երկիրն այսօր ԵՏՄ հանձնաժողովի ղեկավարությունն է իրականացնում,- հիշեցրեց Արսեն Ղազարյանը,- մենք՝ որպես երկիր, գործընթացի մեջ ենք, և 4 տարի ԵՏՄ-ի ձևավորումները, կայացումները շատ բանով կախված են լինելու Հայաստանի կառավարումից և մենեջմենթից»:
ԵՏՄ 170 միլիոնանոց շուկայի ընձեռած հնարավորություններից զատ, հայ գործարարները նաև նոր գործարար կապերի ու ներդրումային ծրագրերի ակնկալիք ունեն:
«Որպեսզի մենք կարողանանք ապրանք արտահանել, մեզ պետք են նոր, խոշոր ներդրումներ՝ տեղական արտադրության վերազինման, արդիականացման համար: Միայն այդ դեպքում մենք կկարողանանք արտահանման մեծ քանակներ ապահովել»,- ասաց Արսեն Ղազարյանը՝ որպես հեռանկարային նշելով, մասնավորապես, պտուղ-բանջարեղենի վերամշակման, գինեգործության ոլորտները:
«Ակնկալում ենք ԵՏՄ-ի կայացման փուլում որոշակի նոր արդյունքների ձեռքբերում: Իսկ դա ԵՏՄ 5 երկրների ինտեգրացիան է և, թող տարօրինակ չթվա, ԵՏՄ-ի՝ որպես կառույցի, ինտեգրացիան ԵՄ-ի հետ»:
Արսեն Ղազարյանին հիշեցրեցինք, որ շուրջ 1 ամիս առաջ ԵՄ-ի գերագույն հանձնակատար, Եվրոպական հանձնաժողովի փոխնախագահ Ֆեդերիկա Մոգերինին կարծիք էր հայտնել, որ Հայաստանի անդամակցությունը ԵՏՄ-ին կազդի ԵՄ-ի հետ տնտեսական և առևտրային համագործակցության ապագա մակարդակի վրա:
Արսեն Ղազարյանն անվստահություն հայտնեց ԵՄ ներկայացուցչի այս հայտարարության նկատմամբ:
«Նույն Մոգերինին Երևանում հայտարարեց, որ ԵՄ-ն Հայաստանի հետ նոր շրջանակային պայմանագիր է մշակում: Եթե երկու տարի առաջ ասում էին՝ վերջ, դուք մեզ ուրացաք, ապա այսօր ասում են՝ ձեզ հետ պետք է առանձին աշխատենք,- ասաց նա,- Մոգերինին իր շուկայի շահերն է պաշտպանում, և ես նրան հասկանում եմ»:
Ինչ վերաբերում է Հայաստանին ԵՄ-ի կողմից առաջարկված նոր շրջանակային համաձայնագրին և դիտարկմանը, որ նոր տնտեսական հարաբերությունները Հայաստանն արդեն պետք է նաև ԵՏՄ-ի հետ համաձայնեցնի, Արսեն Ղազարյանն արձագանքեց. «Իսկ ի՞նչ վատ է, որ 175 միլիոնանոց շուկայով ենք հանդես գալու, ոչ թե 2.5-3»:
«Մի մոռացեք, որ ԵՏՄ-ում որոշումները կոնսենսուսով չեն կայացվում, այլ միաձայն»,- հիշեցրեց արդյունաբերողների և գործարարների միության նախագահը՝ ավելացնելով, որ եթե ԵՏՄ-ում առաջարկվի Հայաստանի շահերին հակասող որևէ օրինագիծ, ապա միայն Հայաստանի «դեմ» քվեարկելը բավական կլինի, որ այն չընդունվի:
