ԵՐԵՎԱՆ, 1 ապրիլի — Sputnik. Չորս տարի է, ինչ սկսվել է սիրիական հակամարտությունը, իսկ Հայաստանը հստակ դիրքորոշում և ստրատեգիկ պլանավորում չունի, կարծում է Արման Բոշյանն ու օրինակելի համարում Հռոմի պապ Ֆրանցիսկոսի և Համայն Ռուսաստանի պատրիարք Կիրիլի օրինակը։ Նրանք խստորեն քննադատեցին քրիստոնյաների ցեղասպանությունը Մերձավոր Արևելքում, մասնավորապես Սիրիայում։
«Ընդհանրապես քրիստոնյաների ու հայերի բնաջնջումն այսօր, կարելի է ասել, կրկնվում է նույն սցենարով, ինչ կատարվել է 100 տարի առաջ։ Հայաստանը պետք է քրիստոնյաներին պաշտպանելու միջոցներ ձեռնարկի պետական մակարդակով»,-ասաց Երևանի աշխարհաքաղաքական ակումբի ղեկավար Արման Բոշյանը։
Նրա խոսքով` Հայաստանն անուղղակիորեն ներքաշված է սիրիական օպերացիայում, քանի որ կանգնած է Ռուսաստանի կողքին։ Բոշյանը դրական է գնահատում այն, որ իրականում Ռուսաստանը Սիրիայում ամրապնդել է դիրքերն ու հզոր ռազմակայան ստեղծել։
«Ռուսաստանն ունի հզոր ռազմակայաններ տարբեր շրջաններում։ Հզորացվել են սևծովյան ուժերը, ռազմական ուժերն Աբխազիայում և Օսեթիայում։ Բավականին ուժեղ է ռուսական ռազմակայանը Հայաստանում։ Դրանից հետո նոր հնարավոր դարձավ սիրիական օպերացիան։ Տեսանք, թե ռազմակայանների ինչ շրջափակման մեջ հայտնվեց Թուրքիան»,-ասաց Բոշյանը։
Հաշվի առնելով, որ Հայաստանը ներքաշված է գլոբալ փոփոխությունների մեջ, Բոշյանի կարծիքով, մենք պետք է մեզ պահենք որպես սուվերեն երկիր, ունենանք սեփական մարտավարությունը։
«Հայաստանը պետք է իր պետական շահերը հստակ ձևակերպի։ Խոսքս վերաբերում է մեր պատմական հողերին։ Վաղը քրդերը կստեղծեն պետականություն, և մեր հողերը կրկին կանցնեն մեկ այլ ուժի, մենք էլ կսկսենք մեղադրել այս կամ այն կողմին»,-ասաց Արման Բոշյանը։
Նա խոսքը եզրափակեց այն մտքով, որ Ռուսաստանը հստակ հաշվարկել է Թուրքիայի ռազմական ուժերը չեզոքացնելու և հնարավորություններն ընդլայնելու քայլերը։ Հերթը Հայաստանինն է, որն այս հարցում արտակարգ լուծում պահանջող մեկդարյա խնդիր ունի։
