ԵՐԵՎԱՆ, 31 մարտի — Sputnik. Հայաստանի կառավարության՝ Վազգեն Սարգսյան փողոցում գտնվող շենքի ընթացիկ վերանորոգման աշխատանքներն ավարտելու համար անհրաժեշտ է 32 միլիոն 500 հազար դրամ: Այս մասին կառավարության նիստում հայտարարեց Պետական գույքի կառավարման վարչության պետ Արման Սահակյանը՝ գործադիրի անդամներին ներկայացնելով այդ մասին որոշման նախագիծը:
Վարչապետ Հովիկ Աբրահամյանը թեև համաձայնեց կառավարության պահուստային ֆոնդից գումար տրամադրել, բայց առիթը բաց չթողեց նախարարությունների աշխատակիցներին նկատողություն անելու համար:
«Փորձը ցույց է տալիս, որ նախարարությունների աշխատակիցները ոչ նորմալ են վերաբերվում գույքին, եթե ավելի կոպիտ չասենք: Հիմա փաստորեն ավելի քան 30 մլն դրամ տվել ենք այդ շենքը վերանորոգելու համար, և ձեր ներկայացմամբ` այնտեղ ահավոր վիճակ է եղել, չգիտեմ ինչու: Չէ՞ որ նախարարությունների պատասխանատուներն են այնտեղ աշխատել»,- ասաց վարչապետը՝ հանձնարարելով վերահսկել, որպեսզի գույքին «նորմալ վերաբերվեն»:
Կառավարության ղեկավարն անդրադարձավ նաև կառավարության վարձակալած շենք-շինությունների խնդրին, որոնց վարձակալության դիմաց պետական բյուջեից ամեն տարի բավական լուրջ գումարներ են վճարվում: Օրինակ` սփյուռքի նախարարությունն «Էրեբունի պլազայում» իր զբաղեցրած տարածքի դիմաց տարեկան շուրջ 83 մլն դրամ էր վճարում:
«Ես երեկ մի քանի շենքերում եմ եղել, որոնք գտնվում են տարբեր գերատեսչությունների հաշվեկշռում: Մենք ունենք բազմաթիվ շենք-շինություններ, որոնք բարձիթողի վիճակում են գտնվում, նպատակային չեն օգտագործվում: Ունենք ծառայություններ, ՊՈԱԿ-ներ, որոնք վարձակալած շենքերում են տեղակայված, և հարկավոր է, որ նախարարներն այդ հարցին անդրադառնան»,- ասաց վարչապետը։
Նա զարմանք հայտնեց, որ որոշ գերատեսչությունների ղեկավարներ թեև ամուր կառչել են իրենց շենքերից, սակայն իրենց վարձակալած այդ ՊՈԱԿ-ներ տարիներով չեն գնում, որ տեսնեն` ինչ վիճակում են, իսկ դրանք «թալանված, քայքայված, կոտրված» են։ Աբրահամյանը հայտնեց, որ հանձնարարել է հաշվառել վարձակալած շենքերում տեղակայված բոլոր պետական մարմինները՝ դրանք կառավարության շենք տեղափոխելու համար:
Իսկ կառավարության երկու շենքերի՝ 2-րդ և 3-րդ մասնաշենքերի սպասարկման, էներգետիկ և կոմունալ ծառայությունների 2016 թվականի ինն ամիսների ծախսերի դիմաց Արման Սահակյանը կառավարությունից այսօր 210 միլիոն 502 հազար դրամ պահանջեց և ստացավ:
