ԵՐԵՎԱՆ, 31 մարտի — Sputnik. Գազի արտահոսքից թունավորվել է 6 մարդ, որոնցից մեկը ԱԻՆ-ի աշխատակից է, որը եկել է օգնություն ցուցաբերելու և ինքն էլ է թունավորվել, «Գրիգոր Լուսավորիչ» բժշկական կենտրոնից, ուր տեղափոխել էին տուժածներին, հայտնեց Sputnik Արմենիայի թղթակիցը:
«Գրիգոր Լուսավորիչ» բժշկական կենտրոնի վերակենդանացման բաժնի վարիչ Սամվել Կարապետյանը հայտնեց, որ տուժածներից 5-ը շուտով դուրս կգրվեն, իսկ մեկը ծայրահեղ ծանր վիճակում է։
Բժշկական կենտրոնի դիմացի կայանատեղում աշխատող Գարուշ պապը Sputnik Արմենիայի թղթակցին պատմեց, որ գազի արտահոսքը վերացնելու համար դիտահոր մտած մարդուն խնդրել է զգույշ լինել:
«Ինձ ասեցին` պապի ջան, մենք մեր գործը լավ գիտենք։ Մի քանի րոպե հետո ուժեղ գազի հոտ լցվեց։ Մոտեցա ու տեսա, որ լյուկի մեջ մարդ կա, և ուզում էին նրան հանել»,-պատմեց ականատեսը։
Նա պատմեց, որ Դավիթ անունով տղամարդը երկար էր մնացել դիտահորում, դրա համար էլ միայն նրա վիճակն է այս պահին ծայրահեղ ծանր։
Փրկարարները սահմանազատել են վտանգավոր տարածքը, իսկ գազի վթարային ծառայության աշխատակիցները վերացրել են գազի արտահոսքը:
