ԵՐԵՎԱՆ, 31 մարտի — Sputnik. Պատգամավոր Էդմոն Մարուքյանի հեղինակած «Քրեական օրենսգրքում փոփոխություններ կատարելու մասին» օրենքի նախագիծն այսօր կառավարության նիստի օրակարգում էր։ Նախագիծը ներկայացնող Արդարադատության նախարար Արփինե Հովհաննիսյանն առաջարկեց․
«Հատկապես հաշվի առնելով, որ նախընտրական տարի է, կառավարությունում քննարկում ծավալել» ու որոշել պատգամավորի առաջարկն ընդունել-չընդունելու հարցը։ Էկոնոմիկայի նախարար Արծվիկ Մինասյանն ու կառավարության աշխատակազմի ղեկավար նախարար Դավիթ Հարությունյանը դեմ արտահայտվեցին` նախագիծն իրավական տեսակետից ոչ ճիշտ համարելով։
«Գյուղերում լինում են դեպքեր, երբ ամուսինը կնոջ անձնագրով գնում է ընտրության»,-ասաց Դավիթ Հարությունյանը։ Բայց վարչապետ Հովիկ Աբրահամյանն առաջարկեց․ «Քանի որ մենք՝ իշխանություններս, մեր առջև խնդիր ենք դրել բարձրացնել հանրային վստահությունը, առաջարկում եմ հաստատել, և Ազգային ժողովը թող որոշի»։
Ու թեև կառավարության որոշ անդամներ նախագծին դեմ էին արտահայտվել, այնուհանդերձ միաձայն հավանության արժանացրին Էդմոն Մարուքյանի հեղինակած նախագիծն ու այն ուղարկեցին ԱԺ։
