ԵՐԵՎԱՆ, 31 մարտի — Sputnik. Հայ դատի հանձնախումբը դիմել է ԱՄՆ նախագահ Բարաք Օբամայի վարչակազմին և պատասխան ստացել, որ Անկարայում ԱՄՆ դեսպանատունն ու Ադանայում հյուպատոսարանը ուշադիր հետևում են Թուրքիայի նախարարների խորհրդի այդ որոշմանը և այդ հարցը բարձրացրել են տեղական և պետական իշխանության մարմիններում։ Այս մասին գրում է Asbarez-ը։
Թուրքիայի կառավարությունը ԱՄՆ-ին տեղյակ է պահել հոգևոր շինությունները պետականացնելու որոշման մասին՝ «որպես բյուրոկրատական միջոց մարտական գործողությունների ընթացքում վնասված կառույցները վերանորոգելու համար»։ Պատասխանում նշվել է, որ տեղական դատարաններում արդեն հայցեր են ներկայացվել այս որոշման դեմ։
Թուրքիայի քրդաբնակ Դիարբեքիր նահանգի Սուրի շրջանում գտնվող հայկական Սուրբ Կիրակոս եկեղեցին պետականացվել է նախարարների խորհրդի որոշումով։ Պետականացվել են Դիարբեքիրի Սուրի շրջանում գտնվող բոլոր կառույցները, այդ թվում` Դիարբեքիրի Սուրբ Կիրակոս եկեղեցին։
