ԵՐԵՎԱՆ, 31 մարտի — Sputnik. Թուրքական սահմանապահները գնդակահարում են փախստականներին, որոնք փորձում են փրկվել Սիրիայի քաղաքացիական պատերազմից, գրում է Լոնդոնի The Times-ը։ Սիրիացիները փորձում են սահմանը հատել և մտնել Թուրքիա:
«Թուրքական սահմանապահ զորքերը գնդակահարում են փախստականներին, երբ նրանք փորձում են փրկվել Սիրիայում ընթացող քաղաքացիական պատերազմից»,- գրում է թերթը` հղում անելով տվյալներին, որոնք ստացվել են Լոնդոնում գտնվող «Մարդու իրավունքների պաշտպանության մոնիտորինգի սիրիական կենտրոն» իրավապաշտպան կազմակերպությունից։ Թերթի տվյալով` վերջին չորս ամսում սպանվել է Թուրքիա մտած 16 միգրանտ, ներառյալ` երեք երեխա, հաղորդում է «Վեստին»` հղում անելով ՏԱՍՍ-ին։
Թերթը վկայաբերում է միգրանտների տեղափոխությամբ զբաղվող մի մաքսանենգի և հայտնում, որ «փախստականները դեռ հատում են սահմանը, բայց այժմ ուզում են, որ իրենց կա՛մ սպանեն, կա՛մ գերի վերցնեն»։ Միաժամանակ, ինչպես հիշեցնում է The Times-ը, «թուրքական իշխանությունները պնդում են, որ շարունակում են հավատարիմ մնալ բաց սահմանների քաղաքականությանն այն սիրիացիների համար, որոնց կյանքն անմիջական սպառնալիքի տակ է գտնվում»։
