ԵՐԵՎԱՆ, 30 մարտի — Sputnik. ՀՀ պաշտպանության նախարարությունը 66 մլն դրամի պայմանագիր է կնքել «Ռադվան» ՍՊԸ-ի հետ՝ վարժասարքերի նորոգման ծառայությունների մասով, այն դեպքում, երբ ընկերությունը զբաղվում է կրթական և շինարարական ծառայությունների մատուցմամբ, և մարզասարքերի հետ, ըստ փորձագետի, առնչություն չունի: Մեկ այլ շինարարական կազմակերպություն էլ՝ «Իմպերիա Տուր» ՍՊԸ-ն ՊՆ-ին 69 մլն դրամի համակարգչային ծառայություններ է մատուցել:
«Հատկապես հետաքրքրական է, որ այս ոլորտը բավականին մրցակցային է, բայց այս կազմակերպությունը մրցույթի միակ մասնակիցն է եղել»,- ասաց փորձագետը՝ հավելելով, որ այլ գերատեսչությունների հայտարարած այսօրինակ մրցույթներին բավական մեծ թվով մասնակիցներ են դիմում:
Իսկ, օրինակ, «Ավանգարդ» ՍՊԸ-ի հետ 11 պայմանագիր է կնքվել, որոնց հիման վրա ընկերությունը մատակարարել է հաց, լվացքի մեքենա, շինանյութ և այլն: «Սովորաբար, նման ֆիրմաները հենց միջնորդավորված գնումներ են կատարում, այսինքն՝ ինչ-որ մեկից գնում են ու վերավաճառում: Իսկ սա արդեն կոչվում է պետական միջոցների անարդյունավետ օգտագործում»,- ասաց Արտակ Մանուկյանը:
Միջնորդավորված գնումները նվազեցնելու համար փորձագետն առաջարկում է, օրինակ, հացահատիկը կամ դիզելային վառելիքը ձեռք բերել բորսայից և ոչ թե վերավաճառող ներկրողներից:
Չհրապարակվող գնումները, որպես կանոն արդարացվում են պետական կամ ծառայողական գաղտնիքով: Այս որակման հետ, սակայն, փորձագետն այնքան էլ համաձայն չէ:
«Հստակ տարանջատված չէ՝ գաղտնի և ոչ գաղտնի: Օրինակ՝ մեքենայի գնումն ինչու պիտի գաղտնի լինի: Ինչն է խանգարում, որ ագրեգացված ձևով նշվի, որ ինչ-որ սուբյեկտի հետ մենք կնքել են այսքան տոննայի հացահատիկի պայմանագիր: Իմ կարծիքով այստեղ որևէ գաղտնի տեղեկատվություն չկա»,- ասաց փորձագետը:
Քննարկմանը ներկա էր ՀՀ պաշտպանության նախարարի խորհրդական, ՀՀ պաշտպանության նախարարին առընթեր հասարակական խորհրդի նախագահ Գեղամ Հարությունյանը, ումից հետաքրքրվեցինք՝ համաձայն է արդյոք ներկայացված փաստերի հետ:
«Մենք գործ ունենք բանակի մատակարարումների, ծառայությունների ապահովման հետ, որոնք անմիջականորեն առնչվում են անվտանգության խնդիրներին: Լինում են դեպքեր, երբ որ շահած կազմակերպություններն այնուհետև ի զորու չեն լինում մատակարարումն իրականացնել: Ես ոլորտի մասնագետ չեմ, բայց հասկանում ե, որ մեկ, երկու, երեք չկայացած մրցույթը արդեն իսկ սպառնալիք է»-ասաց նախարարի խորհրդականը՝ հավելելով, որ ՊՆ-ի համար դժվար է գտնել բարեխիղճ մատակարարներ, ուստի նրանց հետ պարբերաբար կնքվող պայմանագրերը չպետք է դիտարկել, որպես կոռուպցիոն ռիսկերի առկայություն:
Նա նաև նշեց, որ ՊՆ-ում աշխատանքային խումբ է ստեղծվել «Թրանսփարենսի ինթերնեյշնլ»-ի ներկայացրած ռիսկերն ուսումնասիրելու համար, և հույս հայտնեց, որ առաջիկայում հայտնի կդառնա նաև դրանց վերաբերյալ պաշտոնական գնահատականը:
Ինչ վերաբերում է ՊՆ-ի կատարած օտարումներին, որոնց ուսումնասիրությունը կատարել է փորձագետ Վիրաբ Խաչատրյանը, այստեղ ամենացցուն օրինակը ՊՆ-ի հաշվեկշռից օտարված ՄՀՀ-ն է: Գրեթե միաժամանակ օտարվել են նաև Սյունիքի մարզում գտնվող «Տաթև 1» առողջարանային համալիրը, Երևանի Լուկաշին փողոցի վրա գտնվող շենքը, որը նախ Երևանի քաղաքապետարանից հանձնվել է ՊՆ-ին, ապա՝ օտարվել: Առկա հրապարակային տեղեկատվությունը թույլ է տալիս եզրահանգում անել, որ վաճառված գույքի գինը տատանվում է 8-ից 300 մլն դրամի սահմանում:
