ԵՐԵՎԱՆ, 30 մարտի — Sputnik. Երևանում ընթացող «Կրթություն XXI դար» ուսումնական հաստատությունների և ինդուստրիայի նվաճումների միջազգային մասնագիտացված ցուցահանդեսում տասնյակ ինստիտուտներ, համալսարաններ, քոլեջներ և արհեստակցական ուսումնարաններ են ներկայացվել, որպեսզի հայ դիմորդները հայրենիքից դուրս ուսում ստանալու հնարավորություն ունենան։
«Եթե կոնկրետ Հայաստանը դիտարկենք, ապա դիմորդներն ավելի հաճախ ընտրում են հումանիտար մասնագիտությունները, օրինակ` իրավաբանություն, միջազգային հարաբերություններ, տնտեսագիտություն, բուժական գործ և ատամնաբուժություն», — Sputnik Արմենիային ասաց ԺԲՌՀ միջազգային ակադեմիական շարժունակության ստուգման ծառայության ղեկավար Նատալյա Սյուլկովան։
Ինչ վերաբերում է կոնկրետ գիտություններին, ապա նա նշեց, որ արդեն մի քանի տարի է` ինժեներների, մաթեմատիկոսների, քիմիկոսների և ֆիզիկոսների պահանջարկ կա։ Բացի այդ, ԱՊՀ-ում բնապահպանության և ագրարային ոլորտի մասնագետների պակաս կա։
Նա ավելացրեց, որ նման մասնագիտություններով ֆակուլտետներ ընդունվելու համար լավ բազա է հարկավոր, այսինքն աշակերտները պետք է նախապատրաստվեն դպրոցներում, ինչն էլ միշտ չէ, որ ստացվում է։
«Մենք առաջին անգամ ենք նման ցուցահանդեսի մասնակցում Հայաստանում, և հուսով ենք, որ մեր համագործակցությունն արդյունավետ կլինի։ Ներկա պահին ԺԲՌՀ-ում սովորում է 100 հայ ուսանող։ Միայն անցյալ տարի 56 դիմորդ է ընդունվել ՀՀ-ից։ Կան ուսանողներ, որոնք սովորում են ինչպես անվճար, այնպես էլ վճարովի հիմունքներով», — պարզաբանեց Սյուլկովան։
«Կրթություն XXI դար» ցուցահանդեսի կազմակերպիչ և «Ինտեր էքսպո» ցուցահանդեսային ընկերության տնօրեն Ադելինա Քոչարյանն իր հերթին նշեց, որ նման ցուցահանդեսներ նախկինում էլ են անցկացվել, սակայն այս տարվա միջոցառումը բացառիկ է։
«Սա Ռուսերենի ուսումնասիրման կենտրոնի, գիտության և մշակույթի ռուսական կենտրոնի և «Ինտեր էքսպո» ընկերության համատեղ նախագիծն է», — ասաց Քոչարյանը։
Sputnik Արմենիայի զրուցակիցը նշեց, որ ցուցահանդեսի շրջանակում այս տարի առաջին անգամ դիմորդների ընտրություն կանցկացվի ռուսական տարբեր բուհերում ուսանելու համար։ Ըստ նրա` այսօրվա դրությամբ Ռուսաստանում մասնագիտացված կրթություն ստանալու համար հատկացվել է 232 թափուր տեղ։
«Ցուցահանդեսի շրջանակում նրանց հետ հարցազրույց կանցկացնեն։ Կրթությունը ստանալուց և բուհերն ավարտելուց հետո նրանք կվերադառնան Հայաստան ու աշխատանք գտնելու ավելի մեծ հնարավորություն կունենան», — ասաց Քոչարյանը։
Ուսումնական հաստատությունների ներկայացուցիչները դիմորդներին են ներկայացնում ընդունելության կանոնները, ուսուցման արտոնյալ պայմանները, առանցքային քննությունների հանձնման և ուսանողական կյանքի առանձնահատկությունները, ինչպես նաև ընդունելության ստուգումներ և օլիմպիադաներ են անցկացնում։
Բացի հիմնական մասնագիտություններից, աշակերտներն ու ուսանողները կկարողանան ընտրել լրացուցիչ կրթություն` դասընթացներ լեզվական դպրոցներում, դասեր միասնական պետական քննությունների պատրաստման ուղղությամբ, կրթական ծրագրեր արտասահմանում։
Ցուցահանդեսի ընթացքում առաջին անգամ Երևանում Ռուսաստանի գիտության և մշակույթի կենտրոնը կներկայացնի Ռուսաստանի Դաշնության առաջատար բուհերի անվճար ուսուցման կանոնները և կանցկացնի երկու հարյուրից ավելի դիմորդների մրցութային ընտրություն 2016/2017 ուսումնական տարիների համար` ուսուցման բոլոր մակարդակներում։
