ԵՐԵՎԱՆ, 30 մարտի — Sputnik. Ինքնաթիռը օդ է բարձրացել Լառնակայից ժամը 21։20-ին։ Օդանավը, որով տեղափոխել են ուղևորներին, Կահիրեից էր կանչվել։ Ինքնաթիռում էր Եգիպտոսի քաղավիացիայի նախարար Շերիֆ Ֆաթհին և նրան ուղեկցողները, որոնց թվում էր նաև EgyptAir ավիաընկերության փոխնախագահ Ահմադ Ադելը։
Ինքնաթիռի բոլոր ուղևորների հետ զրուցել են ուժային կառույցների ներկայացուցիչները, հենց այդ պատճառով էլ թռիչքը հետաձգվել է։
Կիպրոսից Ալեքսանդրիա մեկնող ինքնաթիռն առևանգել էին առավոտյան ժամը 08։05-ին։ Ահաբեկիչը 59-ամյա Սեյֆ ադ Դին Մուսթաֆան էր։ Նա սպառնում էր պայթեցնել մահապարտի գոտին և պահանջել էր փոխել երթուղին։ Ավելի ուշ պարզ էր դարձել, որ գոտին կեղծ է։ Լառնակայում նա բաց էր թողել բոլոր ուղևորներին (մի մասին միանգամից, մյուսներին` ավելի ուշ), և հանձնվել ոստիկանությանը։
