ԵՐԵՎԱՆ, 29 մարտի — Sputnik. Հայաստանի նախագահ Սերժ Սարգսյանի և Ադրբեջանի նախագահ Իլհամ Ալիևի հանդիպում Վաշինգտոնում կայանալիք միջուկային անվտանգության գագաթնաժողովի ժամանակ չի նախատեսվում, հայտնում է ՌԻԱ Նովոստին` հղում անելով АРА գործակալությանը, որը մեջբերում է ԵԱՀԿ Մինսկի խմբի ամերիկացի համանախագահ Ջեյմս Ուորլիքի խոսքերը։
ԱՄՆ մայրաքաղաքում գագաթնաժողովը կանցկացվի մարտի 31-ից ապրիլի 1-ը։ Ավելի վաղ հայտնել էին, որ գագաթնաժողովին մասնակցելու են Հայաստանի և Ադրբեջանի նախագահները։ Այս հանգամանքը փորձագետներին առիթ տվեց եզրակացնելու, թե ԱՄՆ-ը հրավիրում է Ալիևին Սարգսյանի հետ հանդիպելու։ Սակայն ինչպես հայտնում է գործակալությունը, Ուորլիքը հերքել է երկու պետությունների ղեկավարների հանդիպման հավանականությունը։
«Այս անգամ Ադրբեջանի և Հայաստանի նախագահների հանդիպում Վաշինգտոնում չի նախատեսվում։ Լեռնային Ղարաբաղի հակամարտության խաղաղ կարգավորման ուղղությամբ շարժ արձանագրելու համար կողմերի հետ քննարկումներ եմ նախատեսում անցկացնել մյուս համանախագահների անունից», — հայտնել է Ուորլիքը։
Միջուկային անվտանգության առաջին գագաթնաժողովն անցկացվել է Վաշինգտոնում 2010 թվականին, ինչից հետո նման համաժողովներ անցկացվել են Սեուլում (2012) և Հաագայում (2014)։
