ԵՐԵՎԱՆ, 29 մարտի — Sputnik, Լաուրա Սարգսյան. Երուսաղեմի ռուսական և հայկական սրբավայրերի ավելի քան 60 լուսանկար շուրջ մեկ ամիս կոգեշնչի Ճարտարապետության ազգային թանգարան-ինստիտուտի այցելուներին։
Այստեղ ներկայացված են Լացի պատը, Երուսաղեմի այլ տեսարժան վայրեր, հայկական և ռուսական սրբություններ, հատված Ղուկասի Ավետարանից, սուրբ երկրում հայկական եկեղեցու այգին ու բակը։
Ցուցանմուշների շարքում առանձնանում է «Կ. Կիրակոսյանի լուսանկարչական արհեստանոց» վերնագրված լուսանկարը։ Լուսանկարի տակ հետևյալ գրությամբ ցուցանակ է փակցված. «Գրեթե մինչև XX դարի կեսերը հայ լուսանկարիչները գերակշռում էին Մերձավոր Արևելքի լուսանկարչական շուկայում։ Նրանց թվում էին նաև Ե. Գարաբեդյանը, Խ. Կրիկորյանը»։
Մենք փորձեցինք պարզել լուսանկարի հեղինակի ճակատագրի, լուսանկարչական արհեստանոցի ստեղծման և կայացման մասին, սակայն Պետերբուրգից ժամանած գիտաշխատողն ու թանգարանի տնօրենը չկարողացան մեզ օգնել այս հարցում։
«Հայաստանում ցուցահանդես բացելու գաղափարն առաջացավ Պետերբուրգում Հայ Առաքելական եկեղեցուն կից «Վերնատուն» մշակութային կենտրոնում Ծաղկազարդի տոնին։ Մենք այն ժամանակ որոշեցինք, որ ոչ միայն Պետերբուրգի, այլև Երևանի բնակիչները պետք է տեսնեն այս ցուցահանդեսը», — Sputnik Արմենիայի թղթակցի հետ զրույցում ասաց թանգարանի ավագ գիտաշխատող Ելենա Նիկոլաևան։
XIX դարում կազմավորվել էր պաղեստինյան կայսերական ուղղափառ միություն, որը նպատակ ուներ ուխտագնացություն կազմակերպել սուրբ երկիր, այնտեղ ընդլայնել ռուսական հոգևոր արվեստը։ Միությունը գիտահետազոտական աշխատանքներ է իրականացրել` Երուսաղեմի պատմությունը լուսանկարների միջոցով ներկայացնելով։ Եվ այսպես ժամանակի ընթացքում հավաքածուի մի մասը հասավ Սանկտ Պետերբուրգի կրոնի պատմության պետական թանգարան։
Այսօր Երևանում ներկայացվեցին այն ժամանակաշրջանի լուսանկարները, որոնք հիանալի հնարավորություն ընձեռեցին ծանոթանալու Երուսաղեմի առավել հայտնի հայկական սրբավայրերին։ Թանգարան այցելությունը յուրատեսակ ուխտագնացություն է Իսրայելի հայկական միջավայր, այցելուները ծանոթանում են հայկական թաղամասերին և այն ժառանգությանը, որը երկար տարիներ կերտում էին մեր հայրերն ու պապերը։
«Երուսաղեմի ռուսական և հայկական սրբավայրերը» ցուցահանդեսը կգործի մինչև մայիսի 5-ը։
