ԵՐԵՎԱՆ, 29 մարտի — Sputnik. Երևանում անցկացվող Արդյունաբերողների և գործարարների միջազգային կոնգրեսի խորհրդի նախագահության նիստի մասնակիցները Հայաստան ձեռնունայն չեն եկել: Ինչպես հայտնեց Հայաստանի արդյունաբերողների և գործարարների միության նախագահ Արսեն Ղազարյանը, արտերկրի իրենց գործընկերները գյուղմթերքի, արդյունաբերական թափոնների վերամշակմանն ու ջրի արտադրությանը վերաբերող ներդրումային մի քանի ծրագիր են բերել Հայաստան: Իսկ թե ինչ ծավալի ներդրումների մասին է խոսքը, առայժմ չի հրապարակվում:
Իսկ Եվրասիական տնտեսական հանձնաժողովի Արդյունաբերական և ագրոարդյունաբերական համալիրի հարցերի նախարար Սերգեյ Սիդորսկին հայտնեց, որ ՀՀ կառավարության հետ քննարկվել են ջերմոցային տնտեսության զարգացման, ինովացիոն և նանոտեխնոլոգիաների ծրագրեր: Որպես հեռանկարային ծրագիր` Սերգեյ Սիդորսկին նշեց փայլաթիթեղի արտադրությունը:
«Այսօր մեզ համար շատ ավելի ձեռնտու է Հայաստան բերել հումքը, արտադրել ինովացիոն արտադրանք համարվող փայլաթիթեղը, որն այսօր կարելի է վաճառել աշխարհի բոլոր երկրներում: Այսինքն՝ այսօր նաև դիտարկվում է ԵՏՄ անդամ ՌԴ-ից ու Բելառուսից որոշ ապրանքատեսակների արտադրությունները Հայաստան տեղափոխելու հարցը»,- ասաց Սիդորսկին:
ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանն էլ հույս հայտնեց, որ քննարկված բոլոր ծրագրերը իրատեսական են և կհանգեցնեն լուրջ ներդրումների, աշխատատեղերի ավելացման:
Ինչ վերաբերում է ԵՏՄ-ին անդամակցելուց հետո արտահանման ծավալների նվազմանը, Վաչե Գաբրիելյանը հայտարարեց, որ չանդամակցելու դեպքում արդյունքը շատ ավելի վատը կլիներ:
«Էապես կարգավորվել է նաև աշխատուժի ներհոսք-արտահոսքը, որը ևս հնարավորություն է տվել մեղմել այն սոցիալական հետևանքները, որոնք Ռուսաստանի հետ փոխանցումների նվազումով առկա էին Հայաստանում»,- ասաց Վաչե Գաբրիելյանը:
Երևանում կայացած Արդյունաբերողների և գործարարների միջազգային կոնգրեսի խորհրդի նախագահության նիստին մասնակցում էին գործարար կազմակերպության անդամ 25 երկրից` Բելառուս, Բուլղարիա, Հունգարիա, Հունաստան, Վրաստան, Իտալիա, Ղազախստան, Չինաստան, Ղրղըզստան, Լատվիա, Լիտվա, Մակեդոնիա, Մոլդովա, Լեհաստան, Ռուսաստան, Ռումինիա, Սերբիա, Սլովենիա, Տաջիկստան, Ուկրաինա, Ադրբեջան, Չեխիա, Մոնտենեգրո, Էստոնիա: Հայաստանը ԱԳՄԿ-ին անդամակցում է 1997 թվականից:
