ԵՐԵՎԱՆ, 25 մարտի — Sputnik. Եվրասիական տնտեսական միության տարածքում նախատեսվում է ստեղծել միասնական ֆինանսական համակարգ: Այս մասին երեքշաբթի Երևանում Արդյունաբերողների և գործարարների միջազգային կոնգրեսի խորհրդի նախագահության նիստի ընթացքում լրագրողների հետ զրույցում հայտարարեց ՌԴ արդյունաբերողների և գործարարների միության նախագահի տեղակալ, Ռուսաստանի մարզային բանկերի ասոցիացիայի հիմնադիր նախագահ Ալեքսանդր Մուրիչևը:
Նրա խոսքով` մինչև 2025թ.-ը նախատեսվում է ստեղծել նաև միասնական համակարգող բանկային մարմին:
«Այնուամենայնիվ ազգային բանկերը կպահպանվեն՝ իրենց իրավասություններով: Այստեղ ամենակարևորը Կենտրոնական բանկերի, բանկային համակարգերի գործունեության, լիցենզավորման մասին ազգային օրենսդրությունների նույնականացումն է։ Եթե լինի միասնական շուկա, ապա ՌԴ-ում ստացված լիցենզիայով այս կամ այն վարկային կազմակերպությունը կկարողանա գործել նաև Հայաստանում և ԵՏՄ այլ անդամ երկրներում»,- ասաց Մուրևիչևը:
Միասնական բանկի և միասնական արժույթի ստեղծման հավանականության մասին հարցին ՀՀ փոխվարչապետ, միջազգային տնտեսական ինտեգրման և բարեփոխումների նախարար Վաչե Գաբրիելյանը պատասխանեց.
«Այս պահին ընդամենը կոորդինացման քննարկումներ կան, սակայն միասնական արժույթի քննարկումներ այս պահին չեն տարվում»:
Հիշեցմանը, որ ՀՀ վարչապետ Հովիկ Աբրահամյանն առաջարկել էր ռազմավարական նշանակություն ունեցող ապրանքների դիմաց վճարել միասնական արժույթով, Գաբրիելյանը հստակեցրեց, որ վարչապետի առաջարկը վերաբերում էր ռազմավարական նշանակության ապրանքների դիմաց ռուբլով վճարելուն: Առաջարկն ուժի մեջ է և դրա շուրջ նախնական քննարկումներ են տարվում:
Թե երբ հայտնի կլինի վարչապետի բարձրացրած հարցի պատասխանը, փոխվարչապետը դժվարացավ նշել:
Իսկ լրագրողների դիտարկմանը, որ այդ առաջարկից արդեն կես տարի է անցել, պատասխանեց. «Նման շարժ ԵՄ-ում տեղի է ունեցել տասնամյակների ընթացքում, այնպես որ կես տարին այնքան էլ երկար ժամանակ չէ»։
