ԵՐԵՎԱՆ, 29 մարտի- Sputnik. «Զվարթնոց» օդանավակայանի կլոր շենքը քանդելու հարցը ցավոտ է բոլորի համար, որովհետև այն յուրահատուկ իմաստ և նշանակություն ունի, Sputnik Արմենիա միջազգային մամուլի կենտրոնում ասաց Հայաստանի Հանրային խորհրդի օդային տրանսպորտի քաղաքականության հարցերով ենթահանձնաժողովի նախագահ, «Ազգային ավիացիոն ասոցիացիա» կազմակերպության նախագահ, 45 տարվա փորձ ունեցող օդաչու Դմիտրի Աթբաշյանը։
2013թ.-ի ապրիլին «Զվարթնոց» օդանավակայանի կոնցեսիոներ «Արմենիա միջազգային օդանավակայաններ» ՓԲԸ-ն դիմել է Երևանի քաղաքապետարան և հին շենքը քանդելու թույլտվություն խնդրել։ «Զվարթնոց» օդանավակայանի սեփականատեր, արգենտինահայ Էդուարդո Էռնեկյանը հայտարարել է, որ «օդանավակայանի կլոր շենքը պիտանի չէ» և չի օգտագործվում, որովհետև հիմքը շատ թույլ է։
Աթբաշյանի խոսքով` օդանավակայանի շենքը նախագծելուց առաջ բազմաթիվ հետազոտություններ են անցկացվել, և պարզվել է, որ այն շատ դրական կողմեր ունի։
«Շենքը կլոր է, ինքնաթիռների համար նախատեսված 14 կայանատեղի կա։ Կարելի է նույնիսկ կեսկիլոմետրանոց օդանավ կայանել»,- նշեց նախկին օդաչուն։
Շենքի աշտարակի երկարությունը կազմում է 61 մետր. վերևում գտնվող կարգավարը կարող է հանգիստ վերահսկել և կարգավորել ինքնաթիռների թռիչքի գործընթացը, իսկ այլ օդանավակայաններում այդ նպատակի համար տեսախցիկներ են օգտագործվում։ Բացի այդ, ուղևորների մեկնման և ժամանման սրահները բաժանված են։
«Միակ թերությունն այն է, որ խորհրդային տարիներին ի սկզբանե այն նախատեսված է եղել ներքին թռիչքների համար, և այնտեղ տարածքներ չկան մաքսատան և այլ ծառայությունների համար, որոնք համապատասխանում են միջազգային օդանավակայանի չափանիշներին»,- ասաց փորձագետը։
Աթբաշյանն ապատեղեկատվություն որակեց այն խոսակցությունները, թե շենքը կորցրել է ամրությունը։ Նա նշեց, որ խորհրդային տարիներին Մոսկվայում հավանություն են տվել օդանավակայանի շենքի կառուցմանը։
Փորձագետի խոսքով` շենքը կարելի է համապատասխանեցնել ժամանակակից չափանիշներին։
«Պետք է համապատասխան որոշում ընդունել այն մասին, որ հին շենքին ոչ ոք ձեռք չտա այնքան ժամանակ, մինչև կգան խելացի մարդիկ և շենքը կհամապատասխանեցնեն միջազգային չափանիշներին»,- նշեց Աթբաշյանը։
«Զվարթնոց» միջազգային օդանավակայանը բացվել է 1961-ին։ 1985-ին ICAO-ն օդանավակայանին 2-րդ կարգ շնորհեց։ Նոր վերջնակայաններ են բացվել 1998-ին՝ Բեռնային համալիրը, իսկ 2007թ.-ին՝ Նոր միջազգային ուղևորափոխադրման վերջնակայանը։ 2002թ.-ի հուլիսին ՀՀ կառավարության և «Կորպորասիոն Ամերիկա» ընկերության միջև կնքվեց պայմանագիր, ըստ որի` «Զվարթնոց» միջազգային օդանավակայանը 30 տարի ժամկետով կոնցեսիոն կառավարման հանձնվեց «Արմենիա միջազգային օդանավակայաններ» ընկերությանը։
