ԵՐԵՎԱՆ, 29 մարտի- Sputnik. Հայաստանն օդային օրենսդրության կարիք ունի, այլապես նոր ազգային ավիափոխադրողների բոլոր ջանքերը կտապալվեն, Sputnik Արմենիա միջազգային մամուլի կենտրոնում ասաց Հայաստանի Հանրային խորհրդի օդային տրանսպորտի քաղաքականության հարցերով ենթահանձնաժողովի նախագահ, «Ազգային ավիացիոն ասոցիացիա» կազմակերպության նախագահ Դմիտրի Աթբաշյանը։
«Ոչինչ չի հաջողվի անել առանց օրենսդրական կարգավորման։ Ավելին` երկիրը, որը չունի սեփական ավիացիա, չի կարող անկախ պետություն համարվել։ Եթե մեր սահմանադրությունում ասվում է, որ Հայաստանն անկախ պետություն է, բայց ավիացիա չկա, նշանակում է նրանք, ովքեր ոչնչացրել են ավիացիան, հանցագործ են»,- ասաց Աթբաշյանը։
Նրա խոսքով` սահմանադրությունը ոտնահարած անձինք պետք է պատասխանատվություն կրեն։
Խոսելով նոր ուղևորափոխադրողի` Armenia ընկերության ավիաշուկա դուրս գալու մասին, փորձագետը նշեց, որ փոխադրողը կարող է ժամանակավոր աշխատել, որպեսզի մրցակիցներից մեկին ժամանակավորապես «խեղդի»։
Նա նշեց, որ ընկերության ավիատոմսերի հայտարարած ցածր գները հասարակությանը գրավելու միջոց են։
«Ինքնարժեքից ցածր գնով ոչ ոք չի կարող աշխատել։ Եթե ընկերությունը եկամտի այլ շուկա ունի, ապա որևէ չվերթ կարող է էժան գնով իրականացնել»,- ասաց փորձագետը` պատասխանելով Sputnik Արմենիայի հարցին։
Աթբաշյանը վստահ է, որ ոլորտի բոլոր հարցերն անմիջականորեն կապված են օրենսդրական կարգավորման հետ, և «կյանքն ապացուցել է դա»։
«Արմենիա» ավիաընկերության առաջին չվերթը նախատեսված է ապրիլի 21-ին։ Առաջին թռիչքը կիրականացվի Boeing 737-700 ինքնաթիռով։ Ընկերությունը կանոնավոր չվերթեր կիրականացնի 17 ուղղությամբ։
«Արմենիա» ավիաընկերության հիմնադիրներն են Աշոտ Թորոսյանը (51% բաժնետոմս), Թամազ Գաիաշվիլին (25%) և Ռոբերտ Հովհաննիսյանը (24%)։
