ԵՐԵՎԱՆ, 28 մարտի- Sputnik. Հայաստանի և Ադրբեջանի նախագահներին միջուկային անվտանգության գագաթնաժողովին հրավիրելու նպատակը գերազանցապես այն է, որ նրանք հանդիպեն, կարծում է Միջազգային հարաբերությունների և անվտանգության հայկական ինստիտուտի ղեկավար Ստեփան Սաֆարյանը:
«Տվյալ պահին ոչ մի երաշխիք չկա, որ Ադրբեջանի նախագահը կհամաձայնի հանդիպել Սարգսյանի հետ: Նա անգամ նման հանդիպումների ժամանակ է փորձում սակարկել և ինչ-որ օգուտ ստանալ իր մասնակցությունից»,- ասաց Սաֆարյանը Sputnik Արմենիա պորտալին:
Նրա կարծիքով՝ շփման գծի վերջին ապակայունացումը, որի հետևանքով խաղաղ բնակիչներ են վնասվածքներ ստացել, հենց այդ քաղաքականության հետևանքն է: Սաֆարյանը կարծում է, որ Ալիևը սադրանքները դադարեցնելու դիմաց ինչ-որ բան ստանալու ակնկալիք ունի:
Հայաստանի պաշտպանության նախարարության տվյալով՝ ադրբեջանական զինված ուժերը շարունակում են գնդակոծել հայկական Բերքաբեր սահմանամերձ գյուղը: «Ակնհայտ է, որ երկու երկրի նախագահներին հրավիրել են գագաթնաժողովին գերազանցապես հանդիպելու համար»,- նշեց Սաֆարյանը:
Նրա խոսքով՝ հնարավոր հանդիպումը ղարաբաղյան հակամարտության կարգավորման հարցում ԱՄՆ-ի դերի ցուցադրությանն ուղղված նախաձեռնություն չէ: Ամերիկացիների համար, առաջին հերթին, շահավետ է տարածաշրջանում խաղաղության պահպանումը: Քանի որ Ռուսաստանի ազդեցությունը հակամարտության կողմերի վրա շատ մեծ է, իսկ Մինսկի խումբը հավանաբար միակ ձևաչափն է, որտեղ ԱՄՆ-ն ու Ռուսաստանն ընդհանուր լեզու են գտնում, ամերիկացիները չեն ձգտում իրենց ձեռքը վերցնել բանակցային գործընթացը:
Սաֆարյանը կարծում է, որ բարդ է ինչ-որ ենթադրություններ անել, թե ինչ արդյունք կունենա հնարավոր հանդիպումը:
Հանդիպումների թիվը չափազանց քիչ է սահմանի լարվածությունը նվազեցնելու համար, սակայն նրա կարծիքով՝ եթե նախագահները հանդիպեն, կքննարկվի նաև սահմանի միջադեպերի հետաքննության հարցը:
«ԱՄՆ-ն արդեն որերորդ տարին է՝ միջադեպերի հետաքննության մեխանիզմ ստեղծելու օգտին է հանդես գալիս, այդ մասին բազմիցս խոսել է համանախագահ Ուորլիքը: Ցավոք սրտի, Ռուսաստանի և Ֆրանսիայի համանախագահները նույնը չեն անում»,- ասաց Սաֆարյանը:
Նա տարակուսանք հայտնեց, թե ինչու մյուս համանախագահները, մասնավորապես Ռուսաստանը, չի միանում այդ նախաձեռնությանը, չէ՞ որ Հարավային Կովկասում ապակայունացումը չի բխում Ռուսաստանի շահերից, հատկապես ռուս-թուրքական առճակատման պայմաններում:
Հայաստանի և Ադրբեջանի նախագահների վերջին հանդիպումը տեղի է ունեցել 2015թ.-ի դեկտեմբերի 19-ին Բեռնում: Երկու երկրների առաջնորդների հանդիպումը կայացել է ԵԱՀԿ Մինսկի խմբի համանախագահների միջնորդությամբ:
