Արմենուհի Մխոյան, Sputnik.
Պեմզաշենցի 25-ամյա երիտասարդը, որը մեր բոլոր ջանքերին ի պատասխան հրաժարվեց անունն ասել ու նկարվել, օրվա հացը փորձում է վաստակել Արթիկում՝ տաքսի վարելով:
Անունը չասաց, բայց դժգոհեց՝ անարդարություն է. «Չեմ կարող ամուսնանալ գործ չլինելու պատճառով: Անփող տղին աղջիկ ո՞վ կտա: Համ էլ ասենք՝ նշանվեցի, ընտանիք կազմեցի, էդ աղջկան պահել է պետք չէ՞, հագնել ու ուտել է ուզելու: Հետո էլ ասում են՝ ազգը քչանում է, բա գործ կա՞, որ ամուսնանանք ու ընտանիք պահենք»:
Երիտասարդը վստահ է՝ գործ չլինելու պատճառով ոչ միայն երիտասարդները չեն ամուսնանում, այլ նաև լքում են հայրենիքը:
«Ջահել տղա եմ, մեծ ծնողներիս, ընկերուհիներիս թողեցի, գնացի խոպան, էն էլ խոպանում էլ գործերս չստացվեցին ու ստպված հետ եկա, հիմա էլ 100-200 դրամով տաքսի եմ քշում: «Պարապ պետության նախարար» եմ աշխատում: Ի՞նչ է լինելու սրա վերջը: Հետո էլ ասում են` ազգը քչանում է, արտասանում են՝ մենք քիչ ենք, սակայն մեզ հայ են ասում…»:
Պարապ պետության նախարարն ունի նաև ստեղծված իրավիճակի վերաբերյալ իր կարծիքը:
«Մեր պետության փողերը Երևան ու Ղարաբաղ են գնում, մնացած գյուղերն ու քաղաքները սոված ջարդվում են: Աշխատանք լինի, մենք մեր գլուխը պահենք, թե չէ ահել ու ջահել չկա՝ բոլորս պատի տակ օր ենք անցկացնում»,-ավելացրեց երիտասարդը:
Պեմզաշեցու բողոքը լսելով՝ միացան նաև տարածքում հավաքված մյուս վարորդները, բոլորի խնդիրը նույնն էր՝ աշխատանք չկա, միայն թե «դարդին դարման անող» էլ չկա:
