ԵՐԵՎԱՆ, 28 մարտի — Sputnik. ԱՊՀ երկրների գլխավոր շտաբերի ղեկավարները երկուշաբթի կհանդիպեն Մինսկում` քննարկելու մինչև 2020 թվականը ԱՊՀ երկրների ռազմական համագործակցության հայեցակարգի իրականացումը և Համագործակցության պետությունների ռազմական ուժերի 2017 թվականի համատեղ միջոցառումներին վերաբերող հարցերը:
«Այսօր Մինսկում Ռուսաստանի զինված ուժերի գլխավոր շտաբի ղեկավար, Ռուսաստանի ՊՆ առաջին տեղակալ, գեներալ Վալերի Գերասիմովի նախագահությամբ կկայանա ԱՊՀ մասնակից պետությունների զինված ուժերի շտաբերի պետերի կոմիտեի նիստը», — ասել են Ռուսաստանի ՊՆ-ից։
Այնտեղ պարզաբանել են, որ քննարկվելու է ռազմական համագործակցության տարբեր ուղղություններին վերաբերող 11 հարց:
«Նիստի ընթացքում հատուկ ուշադրություն կդարձվի մինչև 2020 թվականը ԱՊՀ երկրների ռազմական համագործակցության հայեցակարգի իրականացմանն ու Համագործակցության պետությունների ռազմական ուժերի կողմից 2017 թվականին անցկացվելիք համատեղ միջոցառումներին վերաբերող հարցերին», — ընդգծել են ռազմական գերատեսչությունից:
Կոմիտեի աշխատանքաներին կմասնակցեն Հայաստանի, Բելառուսի, Ղազախստանի, Ղրղըզստանի, Ռուսաստանի, Ադրբեջանի և Տաջիկստանի պատվիրակությունները: Սպասվում է, որ Միսնկում աշխատանքային այցի շրջանակում Ռուսաստանի Գլխավոր շտաբի ղեկավարը երկկողմ հանդիպումներ կունենա Տաջիկստանի և Բելառուսի գործընկերների հետ, որի ընթացքում կքննարկվեն պետությունների ռազմական և ռազմատեխնիկական համագործակցության հարցերը:
