ԵՐԵՎԱՆ, 28 մարտի — Sputnik. Հայաստանի ներկայացուցիչ Լևոն Արոնյանը Մոսկվայում անցկացվող հավակնորդների առաջնության 13-րդ փուլում ոչ-ոքի խաղաց ռուս Սերգեյ Կարյակինի հետ:
Արոնյանը «Ռ-Սպորտ» գործակալությանը տված հարցազրույցում ասել է, որ Կարյակինի հետ խաղը հավակնորդների առաջնությունում հաջողության հասնելու իր չօգտագործած հնարավորությունների շարքի շարունակությունը դարձավ:
«Ես զգալի առավելություն ունեի, պարզապես պետք է նավակը վերադարձնեի c1 և հաղթական դիրք կզբաղեցնեի։ Չգիտեմ ինչու նավակը դրեցի a5-ի վրա, դա բացարձակ անտաղանդ քայլ էր: Այսօր ես կորցրի հաղթելու հնարավորությունը, ինչպես և նախորդ օրերին: Մոսկվայի առաջնությունն ինձ մոտ չստացվեց, սա կորցրած հնարավորությունների առաջնություն էր: Ես շատ վշտացած եմ», — ասել է նա:
Ռուս գրոսմայստեր Սերգեյ Կարյակինն ու ամերիկացի Ֆաբիանո Կարուանան հավակնորդների առաջնության 13 խաղերից հետո առաջատար դիրք են զբաղեցնում:
13 խաղից հետո Կարուանան և Կարյակինը հավաքել են 7.5 միավոր, Անանդը` 7, Նակամուրան, Արոնյանը, Սվիդլերը, Գիրին` 6.5-ական, Տոպալովը` 4 միավոր:
Եզրափակիչ փուլում մարտի 28-ին կխաղան Սվիդլեր-Անանդ, Գիրի-Տոպալով, Նակամուրա-Արոնյան, Կարյակին-Կարուանա զույգերը:
Մինչև մարտի 30-ը Մոսկվայում անցկացվող առաջնության հաղթողը կդառնա ներկայիս աշխարհի չեմիպիոն, նորվեգացի Մագնուս Կարլսենի մրցակիցը 2016 թվականի նոյեմբերին ԱՄՆ-ում կայանալիք աշխարհի ուժեղագույն շախմատիստի կոչման համար պայքարում:
