ԵՐԵՎԱՆ, 28 մարտի — Sputnik. Նախորդ շաբաթ երեք օրվա ընթացքում երեք երկրաշարժ գրանցվեց Հայաստանում` Աշոցքի, Իջևանի և Ստեփանավանի մոտակայքում: Իսկ մարտի սկզբին երկրաշարժեր էին գրանցվել Գավառում։ Այս կապակցությամբ Հրաչյա Պետրոսյանը նշեց, որ դրանք չպետք է խուճապի պատճառ դառնան։
«Անկախ երկրաշարժի ուժից, լինի դա թույլ կամ ուժեղ ցնցում, համարժեք չափով էներգիան լիցքաթափվում է, դեֆորմացիաները թուլանում են: Թեև երկրաշարժ երևույթն, իհարկե մտահոգիչ է, բայց այն ունի իր դրական կողմը. թույլ ցնցումներն ուժեղները պարպելու միջոց են»,- նշեց նա։
Պետրոսյանը պարզաբանեց, որ Հայաստանը երկրաբանական տեսակետից բաժանվում է մի քանի բլոկի, որոնց սահմանները հենց տեկտոնական ակտիվ խզվածքներն են, այսինքն` սեյսմածին խզվածքները:
«Մարտի 4-ին և 5-ին մի քանի թույլ սեյսմիկ ցնցումներ են եղել Գավառի տարածքում և այս վերջին օրերին սեյսմիկ ցնցումներ են գրանցվել Ստեփանավանի, Տաշիրի, Իջևանի շրջաններում, նաև Աշոցքում, սրանք այլ խզվածքների են հարում, որևէ կապ չունեն Գավառի ցնցումների հետ»,- նշեց նա:
Ըստ նրա` մի բան պարզ է, որ հանրապետության կենտրոնական և հյուսիսարևմտյան հատվածում նկատվում է թույլ սեյսմիկության ակտիվացում, որը բավական ժամանակ չկար, երկրակեղևը հանգիստ էր: Դա պարբերական բնույթ է կրում, և ցնցումները սովորական, նորմալ երևույթ են այնպիսի սեյսմիկ տարածքներում, որոնցից մեկը Հայաստանի տարածքն է:
«Մենք տեղում ենք, աշխատում ենք և ունենք շուրջօրյա հերթապահություն, տվյալները ստացվում և մշակվում են»,- հավաստիացրեց Հրաչյա Պետրոսյանը:
.jpg){kind=link}