ԵՐԵՎԱՆ, 27 մարտի — Sputnik. Երուսաղեմի Հարության տաճարի մատուռի վերանորոգումը կսկսվի ուղղափառ Զատկից հետո` մայիսի 1-ին, հայտնում է Երուսաղեմի ռուսական հոգևոր առաքելության մամուլի ծառայությունը:
Աշխատանքները կիրականացվեն 8 ամսից ոչ պակաս: Ուխտագնացները վերանորոգման ընթացքում կկարողանան այցելել սրբավայր:
«Վերանորոգման աշխատանքները կիրականացնեն Աթենքի ազգային տեխնիկական համալսարանի մասնագետները և Ֆլորենցիայի համալսարանի աշխատակիցները, ինչպես նաև փորձագետներ Հայաստանից: Նրանք կամրացնեն կառույցը, կթարմացնեն մատուռի կարերը, կփոխարինեն քարե երեսպատման վնասված մասերը, կմաքրեն կուտակված մուրը», — ասվում է հաղորդագրության մեջ:
Այսօրվա կառույցը Հիսուսի գերեզմանի վրա կառուցվել է 1810 թվականին` 1808 թվականի ավերիչ հրդեհից հետո: 1810 թվականից մատուռը չի վերանորոգվել:
Մի քանի տասնամյակի ընթացքում շինությունը տուժել է վատ եղանակային պայմաններից: 1927 և 1934 թվականին մատուռն ավերվել է երկրաշարժի հետևանքով: Սա պատճառ դարձավ, որ տաճարը մասամբ քանդվի, իսկ այնուհետև 1947 թվականին` որպես ժամանակավոր միջոց, ամրացումներ տեղադրվեցին: Բացասական ազդեցություն է ունենում շինության վրա նաև միլիոնավոր զբոսաշրջիկների և ուխտավորների ներկայությամբ պայմանավորված բարձր խոնավությունը, ինչպես նաև մոմերից բարձրացող տաք օդը:
Տիրոջ գերեզմանի տաճարը (Հարության տաճար) գտնվում է այն վայրում, որտեղ, եկեղեցական ավանդույթի համաձան, խաչվել է ու թաղվել, իսկ այնուհետև հարություն առել Քրիստոսը: Այն ճարտարապետական համալիր է, որը ներառում է Գողգոթան, Խաչգյուտ քարայրը և մի քանի այլ կից կառույցներ: Այստեղ նաև գործում է մի քանի մենաստան, օժանդակ շինություններ:
Տաճարը բաժանված է վեց դավանանքի միջև` հույն, կաթոլիկ, հայ, ղպտի, սիրիական ու եթովպական, որոնցից յուրաքանչյուրին առանձին տեղ ու աղոթելու ժամ է հատկացված:
