ԵՐԵՎԱՆ, 25 մարտի — Sputnik. Ֆիլմի պրեմիերայից առաջ ռեժիսոր Ալեքս Ամիրյանը պատասխանեց լրագրողների հարցերին և պատմեց իր հետագա ծրագրերի մասին:
Ռեժիսոր, սցենարիստ և գլխավոր դերակատար Ալեքս Ամիրյանը հայտնեց, որ ֆիլմն արդեն ցուցադրվել է ԱՄՆ-ում և հիմնականում դրական արձագանք է ստացել, սակայն հեղինակի համար շատ կարևոր է հայաստանյան ցուցադրությունը, թեև ֆիլմն, առաջին հերթին, ներկայացնում է ներգաղթյալների կյանքը:
Կինոնկարը ցուցադրում է այդ արդիական խնդրի հոգեբանական ու սոցիալական կողմը:
«Գանգստերային պատմության միջոցով փորձել եմ ներկայացնել ներգաղթյալների կյանքը: Ներգաղթյալը հիմնականում խնդիրներ է ունենում տեղացիների հետ: Շատ հերոսներ, որոնց կտեսնեք ֆիլմում, իրականում եղել են»,- պատմեց Ալեքս Ամիրյանը:
Նկարահանումներն անցկացվել են ԱՄՆ-ում (Շարլոտ,Նյու-Յորք, Դետրոյթ, Մայամի), Կանադայում (Վինզոր), Ռուսաստանում (Մոսկվա), Ուկրաինայում (Օդեսա), Բելգիայում (Բրյուսել): Ֆիլմում նկարահանվել են Պավել Նովիկովը, Վլադիմիր Եպիսկոպոսյանը, Իգոր Գուզունը, Ռուդոլֆ Ղևոնդյանը, Մաքս Ռուչկինը, Կոնստանտին Բրոմբերգը:
Ֆիլմը կազմված է երկու մասից՝ «Ռուսական դրվածք» և «Ստվերների ճակատամարտ», որոնք ինքնուրույն երկու նախագիծ են՝ միավորված ընդանուր պատմությամբ:
Հեղինակները պատրաստվում են այն ներկայացնել միջազգային կինոփառատոներում և ցուցադրել ոչ միայն Երևանում, այլև Հայաստանի մյուս քաղաքներում:
Ֆիլմի ողջ հասույթը կտրամադրվի «Արմավենի» բարեգործական հիմնադրամին` հենաշարժական ապարատի հիվանդություններով տառապող երեխաների բուժման համար:
