ԵՐԵՎԱՆ, 25 մարտի — Sputnik. Երևանցի դպրոցական Արմեն Գաբրիելյանն արդեն մեկ տարի է, ինչ դպրոցում ռոբոտաշինության խմբակի դասընթացների է այցելում, արդեն հասցրել է անգամ հաջողություններ ունենալ:
«Մենք կրիայով կամ աղվեսով ենք աշխատում»,-Sputnik Արմենիայի հետ զրույցում ասում է Արմենն ու բացատրում, որ դրանք ծրագրեր են, որոնք խաղեր ստեղծելու հնարավորություն են տալիս:
Արմենի հետ դպրոցական խմբակ է այցելում ևս 20 դպրոցական աղջիկ ու տղա:
Խմբակավար Կարապետ Մանուկյանը պատմում է, որ երեխաները հաճույքով են այցելում, ընդ որում ոչ միայն այդ, այլև մի շարք այլ դպրոցներում:
«Այժմ նման խմբակներ են գործում շուրջ 100 դպրոցում: Այս տարվանից սկսած` նախատեսվում է ամեն տարի բացել ևս 300-ը, և 2019-ին ունենալ 1200 լաբորատորիա՝ ամբողջ Հայաստանի տարածքում»,- ասում է ԻՏՁՄ ներկայացուցիչ խմբակավարը:
Նախաձեռնության նպատակը, ինչպես ներկայացվեց ԻՏՁՄ 16-րդ համագումարի ընթացքում, տեղեկատվական տեխնոլոգիաների ոլորտը բարձրակարգ մասնագետներով համալրելն է, ընդ որում՝ ոչ միայն մայրաքաղաքում, այլև հեռավոր ու սահմանամերձ գյուղերում:
Նշենք, որ խմբակներին 5-9-րդ դասարանի աշակերտները հաճախելու են կամավոր հիմունքներով և անվճար:
ԻՏՁՄ գործադիր տնօրեն Կարեն Վարդանյանը տեղեկացրեց, որ ՀՀ ողջ տարածքում այսօր արդեն նմանօրինակ 85 խմբակ է գործում, այդ թվում՝ Սյունիքի, Տավուշի դպրոցներում:
Կարեն Վարդանյանը հայտնեց, որ կառավարության հետ նախաձեռնել են նաև սահմանամերձ համայնքներում ՏՏ ոլորտի ընկերությունների համար առավել բարենպաստ միջավայր ստեղծել, որպեսզի վերջինները շահագրգռված լինեն աշխատել այդ տարածքներում:
«Արդեն այս տարվա վերջին մեր խմբակների շրջանավարտների ընդհանուր թիվը 4000 կլինի, իսկ հաջորդ տարվանից մենք տարեկան 700 շրջանավարտ կունենանք: Նշանակում է` այդ մարդկանց պետք է շրջաններում աշխատանքով ապահովենք, որպեսզի անիմաստ չգան Երևան»,-ասաց Կարեն Վարդանյանը:
Ի դեպ, նրա խոսքով, Գորիսում, Կապանում, Սիսիանում, Վանաձորում, Գյումրիում ու Հրազդանում արդեն իսկ գործող ձեռնարկություններ կան:
