ԵՐԵՎԱՆ, 25 մարտի — Sputnik. Երևանի «Զվարթնոց» օդանավակայանում, մասնավորապես Երևան-Մոսկվա չվերթն իրականացնող ինքնաթիռում տեղադրված ռումբի մասին ահազանգը կեղծ էր, news.am-ին ասաց ՀՀ ԱԻՆ Փրկարար ծառայության տնօրենի տեղակալ, Երևան քաղաքի Փրկարար ծառայության պետ Մուշեղ Ղազարյանը:
Երևանի ժամանակով 23։31-ին Երևան-Մոսկվա չվերթն իրականացնող օդանավը օդ բարձրացավ։
«Օդանավակայանի ամբողջ տարածքը ուսումնասիրել ենք, հետազոտել ենք ամեն ինչ, բայց ոչինչ չի հայտնաբերվել»,-ասաց նա:
Ղազարյանը հրաժարվեց, սակայն հայտնել, թե որտեղից են ահազանգը ստացել: Նա միայն ասաց, որ հատուկ ծառայություններն ահազանգողի ինքնությունը պարզելու ուղղությամբ աշխատանքներ են տանում:
Մինչև 22:00-ն ոստիկանության և ԱԻՆ աշխատակիցները խուզարկել են օդանավակայանի տարածքը: Խուզարկվել է նաև ժամը 20:35-ին Մոսկվայի «Դոմոդեդովո» օդանավակայանից Երևան ժամանած օդանավը։ Կասկածելի ոչինչ չի հայտնաբերվել, ինչից հետո օդանավը հետադարձ թռիչք է կատարել:
Նշենք, որ Երևան-Մոսկվա ինքնաթիռի թռիչքն ի սկզբանե նախատեսված էր 20։45-ին, հետո երկու անգամ հետաձգվեց` նշանակվելով 21։10-ին, այնուհետև` 21։30-ին։
Այսօր «Զվարթնոց» օդանավակայան տեղեկատվություն էր ստացվել, որ օդանավակայանի տարածքում, մասնավորապես Երևան-Մոսկվա չվերթն իրականացնող ժամը 20։45-ի ինքնաթիռում, պայթյուն է տեղի ունենալու:
