ԵՐԵՎԱՆ, 24 մարտի- Sputnik. Հայաստանի արտահանման ապահովագրական գործակալությունը կապահովագրի ոչ միայն արտահանողներին, այլ նաև նրանց վարկավորող բանկերին, լրագրողներին հաղորդեց երկրի էկոնոմիկայի փոխնախարար Հովհաննես Հովհաննիսյանը։
«Մենք կտրամադրենք ֆակտորինգի ծառայություններ (ծառայությունների համալիր` արտադրողների և առաքողների համար, որոնք առևտրային գործունեություն են ծավալում վճարման երկարաձգման պայմանով. Sputnik)։ Դա արդյունավետ շուկայական մեխանիզմ է` ուղղված երկարաժամկետ հեռանկարին»,- ասաց Հովհաննիսյանը։ Փոխնախարարը նշեց, որ իրենք պատրաստ են փոխհատուցել գործարարներին ողջ ապահովագրությունը և արտահանման վարկերի տոկոսները (վեց տոկոսային կետ)։
Հայաստանի արտահանման ապահովագրական գործակալությունը պետական կառույց է, որը ստեղծվել է մեկ տարի առաջ` արտահանումը խթանելու, արտասահմանյան գնորդների կողմից վճարում չկատարելու դեպքում գործարարներին ապահովագրելու նպատակով։ Գործակալության իրավասության մեջ է մտնում նաև արտահանման ուղղվածություն ունեցող արտադրության զարգացման համար վարկերի տրամադրումը։
Գործակալության գործադիր տնօրեն Վազգեն Աբգարյանը հավելեց, որ գործիքը թույլ կտա ակտիվացնել արտաքին առևտուրը։
«Շուկայի հետազոտությունը ցույց է տվել, որ որոշ փորձագետներ, ունենալով լավ գնորդներ արտասահմանում և առաքման ստորագրված պայմանագրեր, բավականաչափ ֆինանսական միջոցներ ունեն հումք ձեռք բերելու և վերամշակելու, ինչպես նաև արտադրանքի արտահանման համար»,- ասաց Աբգարյանը։
Նրա խոսքով` նոր պրոդուկտը թույլ կտա հայկական բանկերին և ունիվերսալ բանկային կազմակերպություններին առանց կոշտ գրավի իրականացնել արտահանողի վարկավորումը` նրանց հակադարձ միջոցներով ապահովելու նպատակով։
Արտահանում չիրականացնելու դեպքում գործակալությունը պատրաստ է բանկերին և ունիվերսալ վարկային կազմակերպություններին փոխհատուցել միջոցների 95 տոկոսը, որոնք տրամադրվում են փոխառուներին։ Դա իր հերթին թույլ կտա նվազեցնել վարկերի տոկոսադրույքները, որոնք տրամադրվում են բանկերի կողմից և կնպաստի երկրի արտաքին ապրանքաշրջանառության աճին։
«Արմսվիսբանկ» ՓԲԸ-ի գործադիր տնօրեն Գևորգ Մաչանյանը նշեց, որ աշխարհում վաղուց գոյություն ունի նման պրակտիկա, հատկապես այն երկրներում, որտեղ կառավարությունը շահագրգռված է արտահանման ակտիվացմամբ։ Նա հաղորդեց, որ արտահանման վարկերի տոկոսադրույքը գործարարների համար կկազմի 6-14 տոկոս, իսկ վարկերի գումարն անսահմանափակ է։
