RT-ի վավերագրողը նկարահանումներ է կատարել Սիրիայի հյուսիսում գտնվող Աշ Շադադի քաղաքում այն բանից 10 օր անց, երբ ժողովրդական ինքնապաշտպանության քրդական ջոկատները գրավել են այն «Իսլամական պետություն» խմբավորման գրոհայիններից։ Մի քանի ահաբեկիչներ գերի են վերցվել, իսկ փախածները թողել են անձնական իրեր և կարևոր փաստաթղթեր։
«Սրանք փաստաթղթեր են նավթի արդյունահանման մասին, թե օրական որքան նավթ է հանվել որոշակի նավթահորերից, որքանով է վաճառել մեկ բարելը, և արդյունքում որքան նավթ է վաճառվել»,- պատմել է RT լրագրողը։
Ազգությամբ թուրք պատանդ գրոհայինը հաստատել է, որ արդյունահանված նավթը վաճառում է Թուրքիայում։
«Առևտուր կատարվում է, ես դա հաստատ գիտեմ… Բացի այդ, նրանք օգնում են ԻՊ-ին սննդամթերքով, այլ անհրաժեշտ ապրանքով։ Հետո նրանց օգնում են փողով, զենքով, զինամթերքով։ Եվ այդ ամենը բացահայտ է արվում»,- պատմել է թուրք իսլամիստ Մահմուդ Գազի Թաթարը։
Պատանդ գրոհայինները վկայել են, որ իսլամիստների մեծամասնությունը գալիս է Սիրիա Թուրքիայի տարածքով։
«Ես Սիրիա եմ եկել Թուրքիայի տարածքով, ինքնաթիռով, առանց վիզայի։ Եվ ընդհանրապես ԻՊ անդամները միշտ Սիրիա են հասել Թուրքիայի տարածքով։ Ես նկատի ունեմ, որ նրանք երբեք խնդիրներ չեն ունեցել սահմանը հատելու հարցում»,- ասել է ԻՊ պատանդ գրոհային Մոհամեդ Ահմեդը Սաուդյան Արաբիայից։
Ի հաստատումն այդ փաստի, որ ահաբեկիչներն անարգել անցնում են Թուրքիայի տարածք, քուրդ մարտիկները լրագրողներին ցուցադրել են տարբեր երկրներից գրոհայինների անձնագրեր` Լիբիայից, Թունիսից, Բահրեյնից, Ղազախստանից և նույնիսկ Ռուսաստանից։ Այդ բոլոր փաստաթղթերի վրա կա Թուրքիա մուտք գործելու նշումը։
Աշ Շադադի քաղաքը Սիրիայի հյուսիս-արևելքում նավթի արդյունահանման խոշորագույն կենտրոններից է։ Բնակչությունը կազմում է 10 հազար մարդ։
