ԵՐԵՎԱՆ, 23 մարտի — Sputnik. Դիրիժոր Յուրի Դավթյանը աշխարհահռչակ օպերային երգիչ Գեղամ Գրիգորյանին ճանաչել է դեռևս աշակերտական նստարանից: Առնո Բաբաջանյանի անվան երաժշտական ուսումնարանում սովորելու տարիներին դիրիժորն արդեն գնահատել էր Գեղամ Գրիգորյան երիտասարդ տենորի բնատուր ձայնն ու նույնիսկ որոշ փոքր դերեր վստահել նրան օպերայի բեմում: Իսկ Կոմիտասի անվան Կոնսերվատորիայի երրորդ կուրսի ուսանող Գեղամ Գրիկգորյանն արդեն աշխատանք էր ստացել օպերային թատրոնում:
«Մի անգամ օպերայի ղեկավարությունը, որպես դաստիարակչական միջոց, «Իոլանտա» օպերայում որոշեց, որ Գեղամը ոչ թե առաջին դերը պիտի երգի` Վոդեմոնի, այլ` երկրորդական դեր»,- հիշում է Յուրի Դավթյանը` հավելելով, որ խորհրդային թատերական ավանդույթ էր` երգչին շատ չծանրաբեռնելու համար նրան ժամանակ առ ժամանակ երկրորդական դերեր էին տալիս:
Այդուհանդերձ, ըստ դիրիժորի, Գեղամ Գրիգորյանն այս միջադեպից չվիրավորվեց: «Իհարկե, մի քիչ չեմուչում արեց, բայց դե ինչ պիտի աներ, պիտի ենթարկվեր: Բայց ինձ ասաց. «Մաեստրո, ներկայացումից հետո իրար հետ կգնանք ճաշելու»,- հիշում է դիրիժորն ու պատմում, որ ներկայացման ավարտին միասին գնացել են Գեղամ Գրիգորյանի տուն` հարիսա ուտելու և « Գեղամի հաջողությունը նշելու, որ այլևս երկրորդական դերեր չի երգելու»:
Յուրի Դավթյանը հիշեց նաև Գեղամ Գրիկգորյանի հետ իրենց արտասահմանյան հաջողված հյուրախաղերը: «Թող ամպագորգոռ չթվա` իրոք նա համաշխարհային մեծություն էր, և հայ ազգը կորցրեց համար առաջին դասական տենորին»,- ասաց Գեղամ Գրիգորյանի հետ ստեղծագործական մեծ ուղի անցած դիրիժորը:
Ավելի երիտասարդ սենդի ներկայացուցիչ դիրիժոր Էդուարդ Թոփչյանի` Գեղամ Գրիգորյանի մասին հուշերում մեծ տեղ է գրավում անկեղծ ափսոսանքն այն բանի համար, որ տաղանդավոր տենորը չափազանց շուտ հրաժեշտ տվեց բեմական արվեստին: «Մինչև 1999-2000թթ.-ը նա դեռ ակտիվ երգում էր, բայց հետո ես նկատեցի, որ նա աստիճանաբար հրաժեշտ տվեց երգելուն և սկսեց ավելի շատ զբաղվել դասավանդելով, օպերայում գեղարվեստական ղեկավարի աշխատանքով: Իհարկե, դա իմ կարծիքն էր, ես իրավունք չունեի իրեն ինչ-որ բան սովորեցնելու, բայց ասացի, որ իմ կարծիքով, շատ ափսոս է, որ դու պակասեցնում ես երգելը: Հատկապես, որ նա այն տարիքում էր, որ եթե շարունակեր երգելը, դեռ երկար կկարողանար լավ երգել, բայց, ցավոք սկսեց ծխել ու աստիճանաբար թողեց երգելը»,- ասում է դիրիժորը:
Էդուարդ Թոփչյանը նաև մի դրվագ պատմեց ռուս օպերային երգիչ Դմիտրի Խվորոստովսկիի երևանյան այցելությունից, որի ժամանակ Գեղամ Գրիգորյանի կատարած փոքրիկ երգը մինչ օրս դեռ հնչում է նրա ականջին:
«Համերգից հետո ընթրիք էր, բոլորը ոգևորված էին Խվորոստովսկիով: Գեղամ Գրիգորյանն էլ էր ներկա: Նա հենց այնտեղ մի նեոպոլիտանական երգ երգեց: Ճիշտ է` փոքր երգ էր, բայց իր ձայնը, իր զգացողությունը: Շատ հուզիչ էր: Ես ակամայից մտածեցի` սա է իսկական աստղը: Գեղամի բնատուր ձայնն ու տաղանդն, իհարկե, անվիճելի են: Նա, իհարկե, դարձավ աշխարհահռչակ երգիչ, բայց կարող էր ավելի երկար փայլել աշխարհի բեմերում ու նրա անունն ավելի երկար կարող էր մնալ պատմության մեջ»,- ասում է Էդուարդ Թոփչյանն ու ափսոսանքով ընդգծում, որ Գեղամ Գրիգորյանը մեծ բեմում մնաց մինչև 50 տարեկանը: Հետո ասաց, որ հոգնել է և ուզում է ավելի հանգիստ ապրել:
Ցավոք, տաղանդավոր երգչի հանգիստ կյանքը չափազանց կարճ տևեց:
