ԵՐԵՎԱՆ, 23 մարտի — Sputnik. Ազգային ժողովի «Ժառանգություն» խմբակցության քարտուղար Թևան Պողոսյանը հայտնեց, որ իրենք ամենայն հավանականությամբ Հայաստան կվերադառնան վաղը` մարտի 24-ին։
«Լավ ենք, ամեն ինչ նորմալ է, հյուրանոցում ենք, սպասում ենք տոմսերի վերջնական ամրագրմանը։ Ամենայն հավանականությամբ Հայաստան կգանք Ֆրանկֆուրտով։ Մնում է` հասցնենք, որովհետև մեր ունեցած տոմսերով մենք պետք է վերադառնայինք Բրյուսել-Մոսկվա, Մոսկվա-Երևան չվերթերով։ Գոնե Մոսկվա-Երևան մասը օգտագործենք»,- ասաց նա։
Պատգամավորի խոսքով` նախորդ օրվա լարվածությունն անցել է, մարդիկ դուրս են գալիս փողոց, Բելգիայի իշխանությունները կոչ են արել, որ մարդիկ վերադառնան իրենց առօրյա կյանքին, խանութները բաց են, քաղաքային տրանսպորտը սկսել է աշխատել, նույնիսկ մետրոն են վերաբացել։
«Երևի միայն այն կայարաններն են փակ, որտեղ պայթյուններ են եղել։ Կյանքը բնականոն հուն է վերադառնում,- ասաց Թևան Պողոսյանը և ավելացրեց.- Ինձ թվում է` վաղը ճանապարհ կընկնենք, կհասնենք Հայաստան, որ Սուրբ Զատիկը մեր ընտանիքների հետ անցկացնենք»։
Հայկական պատվիրակության կազմում էին Արտակ Զաքարյանը, Հրանտ Բագրատյանը, Վահե Էնֆիաջյանը, Շուշան Պետրոսյանը, Կարինե Աճեմյանը, Մհեր Շահգելդյանը: Նրանք Բրյուսելում մասնակցում էին Եվրանեսթի Խորհրդարանական վեհաժողովին։
