ԵՐԵՎԱՆ, 23 մարտի — Sputnik, Նելլի Դանիելյան. Աբովյան-Կորյուն փողոցների գետնանցում տանող աստիճանների վրա փոքրիկ աղջիկը հիացմունքից փայլող աչքերով նայում էր ձեռքում բռնած հավի վարդագույն ճուտիկին ու զգացմունքների առատությունից մատներն այնքան էր սեղմել, որ քիչ էր մնում շնչահեղձ աներ կենդանի էակին:
Փոքրիկի համար մի քանի օրական ճուտիկն ուղղակի կենդանի խաղալիք է: Իսկ այդպիսի խաղալիքներ այսօր Երևանի մարդաշատ վայրերում կարելի է հանդիպել արկղերով: Սուրբ Հարության տոնին ընդառաջ մանրավաճառները մեծ պահանջարկ ունեցող նոր ապրանք են գտել գումար աշխատելու համար:
Գետնանցումի աստիճաններին դրված ստվարաթղթե արկղի մեջ 2-3 տասնյակ ամենաանբնական գույներով ներկված ճուտիկներ են լցված իրար գլխի՝ կապույտ, կանաչ, վարդագույն, կարմիր: Մարդիկ խայտաբղետ, շարժուն զանգվածի կողքով անտարբեր չեն անցնում: Մեկը քննադատում է, մյուսը՝ հիանում:
Անցորդներից մեկի հարցին, թե մեղք չե՞ն, որ ներկել եք, ճուտիկներ վաճառող երիտասարդը սկսեց վստահեցնել, որ դրանք ներկած չեն, «ձվից են այդպես դուրս գալիս»:
Երբ նույն հարցը երիտասարդին ուղղեց նաև Sputnik Արմենիայի թղթակիցը, նա, որպես իր խոսքերի ապացույց, վերցրեց ճուտիկներից մեկն ու ցույց տվեց փետուրների արմատները՝ վստահեցնելով, որ արհեստականորեն ներկելու դեպքում դրանք համաչափ չէին ներկվի:
Վաճառողը նաև պատմեց, որ ներկված ճուտիկները ստանում են հայաստանյան թռչնաբուծարաններից մեկից, իսկ թե որից, չցանկացավ հայտնել: Փոխարենը հայտարարեց. «Ճուտիկը, եթե ներկես, քրեական գործ է»:
Կենդանաբույժ Հարություն Հովհաննիսյանը դժվարացավ միանշանակ պնդել, որ ճուտիկներին ներկելը վտանգավոր է կենդանու համար: «Դա կախված է ներկի բաղադրությունից,- ասաց նա,- ես տեղյակ չեմ` ինչ ներկերով են ներկում»:
Բայց ֆիզիկական վնասից բացի, մասնագետի խոսքով, դա նաև կենդանու նկատմամբ անհարգալից վերաբերմունքի դրսևորում է:
«Դա ավելի շատ այդ կենդանիներին ձեռ առնելու ձև է, շատ երկրներում նույնիսկ արգելվում է կենդանիներին շոր հագցնելը, տիկնիկի նման դարձնելը: Կենդանի շունչ է, որին պետք է հարգանքով վերաբերվել»,- ասաց Հարություն Հովհաննիսյանը՝ նշելով, որ այս երևույթն առաջին հերթին ազդում է երեխաների դաստիարակության վրա: «Երեխան կարող է տեսնել ու սովորել, մի օր էլ իր շան կամ կատվի հետ նման փորձեր կատարել»,- ասաց մասնագետը:
Տեղեկությունների համաձայն` ճուտիկներ ներկելու սովորույթը տարիներ առաջ մեծ տարածում է գտել ԱՄՆ-ում, այնտեղից էլ տարածվել է աշխարհում: Հարություն Հովհաննիսյանն էլ ասաց, որ այս սովորույթի արմատներն իրականում Իրանից են եկել, ու նշեց, որ չի ընդունում օտարերկրյա սխալ ավանդույթները Հայաստան բերելը:
