ԵՐԵՎԱՆ, 23 մարտի — Sputnik. ՀԾԿՀ-ն ապրիլի 1-ից գազի և էլեկտրաէներգիայի սակագների վերանայման հայտ չի ստացել: Այս մասին Sputnik Արմենիայի թղթակցին հայտնեց հանձնաժողովի նախագահ Ռոբերտ Նազարյանը:
Փոխարենը հանձնաժողովն այսօր կայացրած որոշմամբ, գազի նոր բաժանորդների համար ապրիլի 1-ից ավելացրեց ներտնային համակցման աշխատանքների արժեքը: Ռոբերտ Նազարյանը մեզ հետ զրույցում հայտնեց, որ այս հերթական թանկացումը որևէ ազդեցություն չի ունենա բաժանորդների գրպանի վրա:
«Դա որևէ կապ չունի 1 խմ գազի սակագնի հետ, ոչ էլ սպասարկման ծախսի հետ կապ ունի»,- ասաց Ռոբերտ Նազարյանը:
ՀԾԿՀ զարգացման և մոնիթորինգի վարչության պետ Սերգեյ Աղինյանը, սակայն, խոստովանեց՝ հանձնաժողովի ընդունած որոշումն, այնուամենայնիվ, քաղաքացու գրպանի վրա բացասական ազդեցություն կունենա, բայց միայն նրանց, ովքեր 2016թ.-ի ապրիլի 1-ից հետո են գազի բաժանորդ դառնալու:
Բանն այն է, որ գազն ընդհանուր օգտագործման տարածքից մինչև բաժանորդի տուն հասցնելու համար կատարվող ծախսերը 2005թ.-ից հետո թանկացել են: Նշենք, որ մինչ թանկանալն այս ծառայությունն արդեն մի քանի տասնյակ հազար դրամ արժեր:
«Վերադիր ծախսեր հասկացություն կա, որը վերաբերում է շինարարական աշխատանքներին: Շինարարությունից բացի ունենք, պարզ ասեմ՝ տնօրենի աշխատավարձ, գրասենյակային ծախսեր և այլն»,- ասաց Սերգեյ Աղինյանը:
Այս բոլոր գործոնները հաշվի առնելով էլ ՀԾԿՀ-ն այսօր որոշեց ներտնային գազասպառման համակարգերի նախագծման, շինհավաքակցման, և կարգաբերման աշխատանքների կատարման վերադիր ծախսերի արժեքը սահմանել 13.3%` նախկին 5.3%-ի փոխարեն:
Հենց այսքանով էլ, փաստորեն, ավելանալու է նաև նոր բաժանորդներից՝ բնակարանի գազիֆիկացման համար պահանջվող գումարը, ինչը մեզ հետ զրույցում ընդունեց նաև ՀԾԿՀ-ի ներկայացուցիչը.
«Նոր գազասպառողը, ով իր տանը նոր համակարգ է ցանկանում կառուցել, 8%-ով իր ուղղակի ծախսերն այս մասով ավելանալու են»,- ասաց Սերգեյ Աղինյանը:
ՀԾԿՀ-ի այսօրվա նիստում կայացրած մեկ այլ որոշմամբ էլ հանձնաժողովը երկարացրեց Երևանի ՋԷԿ-ին՝ Վրաստանից էլեկտրաէներգիա ներկրելու իրավունք տվող լիցենզիայի ժամկետը:
Այս որոշմամբ, Երևանի ՋԷԿ-ը մինչև 2017 թվականի դեկտեմբերի 31-ը Վրաստանից էլեկտրաէներգիա ներկրելու իրավունք ստացավ:
Նշենք, որ արտոնագիրն ընկերությունը ստացել է 7 տարի առաջ՝ 2009 թվականի օգոստոսի 13-ին:
