ԵՐԵՎԱՆ, 23 մարտի- Sputnik. Վերջին տարիների վիճակագրությունը ցույց է տալիս, որ Հայաստանում կիբերհանցագործության մակարդակն աճել է, և նոր մոտեցումների կարիք կա, ասաց Հայաստանի Ազգային ժողովի պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանը` պատասխանելով Sputnik Արմենիայի հարցին։
Նրա խոսքով` դրա վրա պետք է իրենց ուշադրությունը հատկապես սևեռեն իրավապահ մարմինների ներկայացուցիչները։
«Մեր գնահատականներով` աշխատանքները հաճախ կրում են հատվածային բնույթ, որի հետ կապված` պետք է ավելի համակարգված և հետևողական պետական քաղաքականության տանել»,- ասաց Նահապետյանը։
Նրա խոսքով` հենց դա է առիթ դարձել, որպեսզի խորհրդարանական լսումների ընթացքում քննարկվեն կիբերանվտանգության ոլորտի հիմնական խնդիրները։
«Տվյալ պահին Հայաստանի Ազգային ժողովի պաշտպանության, ազգային անվտանգության և ներքին գործերի մշտական հանձնաժողովի շրջանակում գործում է աշխատանքային խումբ, որի հիմնական նպատակը կիբերպաշտպանության օրենսդրության կատարելագործումն է»,- ասաց նա։
Նահապետյանը նաև հավելեց, որ երկրում այս ոլորտում կա մասնագետների պակաս։ Նա կարևորեց ծրագրերն` ուղղված համապատասխան կադրերի վերաորակավորմանը։
«Այսօր Հայաստանի իրավապահ կառույցների տարբեր ուսումնական կենտրոններում իրականացվում են վերապատրաստման ծրագրեր։ Սակայն տվյալ դեպքում փոփոխությունների և նոր մեթոդների կիրառման անհրաժեշտություն կա»,- պարզաբանեց Նահապետյանը։
Նա հավելեց, որ կիբերանվտանգությունը կարևոր է Հայաստանի անվտանգության ամրապնդման տեսանկյունից։ Արդյունքում արագ տեմպերով զարգանում են տեղեկատվական տեխնոլոգիաները, բացվում կարևոր ենթակառուցվածքների զարգացման նոր հեռանկարներ, և դրա հետ մեկտեղ աճում է մարտահրավերների և սպառնալիքների քանակը։
Նահապետյանը նաև հավելեց, որ որոշ ժամանակ անց Հայաստանը կհասնի տնտեսության, բանկային, կառավարման համակարգերի, առողջապահության և այլ ոլորտների թվայնացմանը։ 2015թ.-ի դրությամբ Հայաստանի ՏՏ ոլորտում գործում է շուրջ 450 ընկերություն։
Այսօր Երևանում հավաքվել են տարբեր երկրների մասնագետներ, որոնք քննարկում են կիբերհանցագործության խնդիրները ոչ միայն Հայաստանում, այլև ողջ աշխարհում «Կիբերպաշտպանության ոլորտի զարգացումը Հայաստանում. հատվածային կարգավորումից դեպի ռազմավարություն» թեմայով միջազգային սեմինարի ընթացքում։
