ԵՐԵՎԱՆ, 22 մարտի- Sputnik. Երևանի քաղաքապետ Տարոն Մարգարյանն առաջին անգամ սոցիալական ցանցում օնլայն ռեժիմով պատասխանել է երևանցիների բազմաթիվ հարցերին, այդ թվում` իր վարսահարդարի, երեխաների ուսման և ֆուտբոլով տարվելու մասին։
Անձնական կյանքի մասին
Երևանի քաղաքապետի ֆեյսբուքյան հարցուպատասխանի բազմաթիվ հարցեր վերաբերել են նրա անձին և նախասիրություններին: Երևանում բնակվող մի մարզիկ, օրինակ, քաղաքապետին հարցրել է` արդյո՞ք նա սիրում է սպորտ, և Մարգարյանը պատասխանել է, որ երիտասարդ տարիքում ակտիվորեն զբաղվել է ֆուտբոլով, իսկ հիմա աջակցում է սպորտի տարածմանը:
Մեկ այլ նմանատիպ հարցի քաղաքապետը պատասխանել է, որ հետևելու է այս տարի կայանալիք ֆուտբոլի Եվրոպայի առաջնությանը:
Երևանցիներին հետաքրքրել է նաև, թե որ դպրոցն են հաճախում քաղաքապետ Տարոն Մարգարյանի երեխաները և ինչքան գումար է վճարում քաղաքապետը երեխաների կրթության համար, որին նա պատասխանել է, որ իր երեխաները հաճախում են Ավանի թիվ 177 հիմնական դպրոցը, որն անվճար է: Ի դեպ, Մարգարյանը ևս այդ դպրոցում է սովորել։
Երևանի բնակիչներին հետաքրքրող բազմապիսի հարցերի մեջ եղել է նաև հարց քաղաքապետի առօրյայի մասին, այդ թվում` թե ով է նրա վարսահարդարը: Տարոն Մարգարյանը պատասխանել է, որ իր վարսահարդարը տասնամյակներ Ավանում աշխատած, ավանցիներին հայտնի Նորիկն է։
Երևանի մասին հարցեր
Հարցերն ընդգրկում էին քաղաքային տնտեսության բոլոր ուղղությունները` բնակելի շենքերի, բակային տարածքների խնդիրներ, հողօգտագործման իրավունք, ճանապարհաշինություն, քաղաքի արտաքին տեսք, քաղաքային լուսավորություն։ Շատերը բողոքել էին, որ համատիրությունների աշխատակիցները չեն կատարում իրենց պարտականությունները և հաճախ մարդկանց մոլորեցնում են։
«Բազմաբնակարան շենքի ընդհանուր օգտագործման տարածքները, համաձայն համապատասխան օրենքի, համարվում են շենքի սեփականատերերի սեփականությունը: Սակայն մենք միշտ էլ աջակցություն ենք ցուցաբերել բնակելի ֆոնդի պահպանման հարցում: Սակայն կիսում եմ Ձեր այն մտահոգությունը, որ համատիրությունների աշխատանքը թերի է: Իմ կողմից արդեն իսկ հանձնարարվել է Կոմունալ տնտեսության վարչությանն ու վարչական շրջանների ղեկավարներին վերահսկել վերջիններիս գործունեությունը։ Որպես հիմնավոր լուծում նշեմ, որ ներկայումս հարցի լուծումը դիտարկվում է օրենսդրական կարգավորման համատեքստում»,- նշել է քաղաքապետը:
Հարցուպատասխանի շրջանակում գերակշռող հարցերի մեկ այլ խումբ էլ վերաբերում էր բնակիչների կողմից նշված հասցեներում բակային տարածքները բարեկարգելու խնդրանքներին: Ընդ որում` առաջարկում էին խաղահրապարակների կառուցման ծրագրերն իրականացնել տարբեր վարչական շրջաններում: Առաջարկների հետ կապված` քաղաքապետ Տարոն Մարգարյանը պատասխանել է, որ միայն անցած տարի Երևանի տարբեր վարչական շրջաններում բարեկարգվել է 400 բակ, և այդ գործընթացը շարունակվում է:
Տարոն Մարգարյանը պատասխանել է նաև Sputnik Արմենիայի հարցին Երևանի հասարակական տրանսպորտի խնդիրների վերաբերյալ։
«Տրանսպորտի խնդրի լուծումը համալիր մոտեցում է պահանջում, մենք այս ուղղությամբ ուսումնասիրություններ ենք իրականացնում, և մոտ ապագայում Երևանը կունենա միջազգային չափանիշներին համապատասխան տրանսպորտային համակարգ։ Այս պահին առկա ռեսուրսներն առավելագույնս օգտագործվում են։ Ինչ վերաբերում է վարորդների էթիկական պահվածքին, ապա այս հարցը ևս իմ ուշադրության կենտրոնում է, ինչի հետ կապված` տրանսպորտի վարչության կողմից սահմանված է ամենօրյա հսկողություն երթուղիները սպասարկող ընկերությունների աշխատանքի հանդեպ»,- ընդգծել է Մարգարյանը:
Մեկ այլ քաղաքացի էլ հարցրել է քաղաքապետին, թե ով է նրա սիրելի քաղաքական գործիչը:
«Ինձ համար լավագույն քաղաքական գործիչը և ուսուցիչը եղել է և կա հայրս՝ Անդրանիկ Մարգարյանը»,- պատասխանել է քաղաքապետը:
