ԵՐԵՎԱՆ, 22 մարտի- Sputnik. Հայկական դիվանագիտական կառույցների աշխատակիցներն անվտանգության մեջ են, հաղորդում է Բելգիայի Թագավորությունում Հայաստանի Հանրապետության արտակարգ և լիազոր դեսպան Թաթուլ Մարգարյանը։
Մարտի 22-ին պայթյունների շարք է գրանցվել Բրյուսելում։ Երկու պայթյուն որոտացել է օդանավակայանում, մեկը` մետրոյում, կա 34 զոհ։
«Ինչպես արդեն տեղյակ եք, Բելգիայում հայտարարվել է արտակարգ իրավիճակի բարձրագույն աստիճան, դադարեցվել է օդանավակայանի, մետրոյի, հանրային այլ տրանսպորտի գործունեությունը: Բրյուսելում հայկական դիվանագիտական ներկայացուցչությունների անձնակազմը և այստեղ գտնվող Ազգային ժողովի պատվիրակության անդամները ապահով են և շարունակում են իրենց գործունեությունը»,- ասել է Մարգարյանը։
Նրա խոսքով, դեսպանությունը մշտական կապ է պահպանում Բելգիայի կառավարության համապատասխան օղակների հետ հետագա իրավիճակը պարզելու նպատակով: Բելգիական կողմի հետ ճշտվում է՝ արդյոք զոհերի և վիրավորների շրջանում կա՞ն ՀՀ քաղաքացիներ կամ հայազգի անձինք:
Այժմ Բրյուսելում է գտնվում հայկական պատվիրակությունը` ԱԺ արտաքին հարաբերությունների մշտական խորհրդարանական հանձնաժողովի նախագահ Արտակ Զաքարյանի գլխավորությամբ։ Պատվիրակությունը մասնակցում է Եվրանեսթի խորհրդարանական վեհաժողովին, որն ընթանում է մարտի 21-23-ը Բրյուսելում։ Պատվիրակության կազմում է նաև Հայաստանի ԱԺ արտաքին կապերի մշտական հանձնաժողովի անդամ Թևան Պողոսյանը։
