ԵՐԵՎԱՆ, 22 մարտի — Sputnik. Sputnik Արմենիան ուղիղ կապ է հաստատել Բրյուսելում գտնվող մեր գործընկերներ Ռուզաննա Ամիրջանյանի և Ծովինար Նազարյանի հետ, ովքեր պատմում են, որ Բելգիայի մայրաքաղաքում համատարած խուճապ է, բջջային կապը գրեթե կաթվածահար է: Իշխանությունները հորդորում են առանց լուրջ անհրաժեշտության հեռախոսից չօգտվել ու անհարկի չծանրաբեռնել հեռախոսակապը:
Ռուզաննա Ամիրջանյանի փոխանցմամբ` պայթյունից հետո երեխաներին թույլ չեն տվել դուրս գալ դպրոցից, մինչև ծնողները կգան նրանց հետևից:
Ծովինար Նազարյանն էլ պատմում է, որ պայթյունի պահին խանութում է եղել: Անվտանգության աշխատակիցները խանութում գտնվող բոլոր անձանց հորդորել են արագ մոտենալ դրամարկղերին, ավարտել առևտուրն ու դուրս գալ խանութից, ինչից հետ փակել են այն:
Մեր զրուցակիցները նշեցին, որ ներկա պահին Բրյուսելում դադարեցված է երթևեկությունը, չեն աշխատում նաև մետրոն ու տրամվայները, փակ են դպրոցները, խանութները, բանկերն ու մյուս հաստատությունները:
Մարտի 22-ին պայթյունների շարք է գրանցվել Բրյուսելում։ Երկու պայթյուն որոտացել է օդանավակայանում, երկուսը` մետրոյում։
