ԵՐԵՎԱՆ, 21 մարտի — Sputnik. ԵԱՀԿ ՄԽ համանախագահները և նախագահող Գերմանիան կոչ արեցին Հայաստանին ու Ադրբեջանին` Զատկի ու Նովրուզի ժամանակ պահպանել հրադադարի ռեժիմը։
ԵԱՀԿ-ում նախագահող Գերմանիայի կառավարության հատուկ ներկայացուցիչ Գերնոտ Էրլերը և ԵԱՀԿ ՄԽ համանախագահներ Իգոր Պոպովը (Ռուսաստան), Ջեյմս Ուորլիքն (ԱՄՆ) ու Պիեր Անրդյուն (Ֆրանսիա) հաստատել են իրենց հավատարմությունը Լեռնային Ղարաբաղի հակամարտության բանակցային եղանակով կարգավորմանը, ասված է ԵԱՀԿ կայքում տեղադրված հաղորդագրության մեջ։
«Խաղաղ բանակցային գործընթացում առաջընթաց արձանագրելու համար չափազանց կարևոր է, որպեսզի կողմերը բոլոր միջոցները ձեռնարկեն, մասնավորապես, շփման գծում ու հայ-ադրբեջանական սահմանին ապրող խաղաղ բնակչության նկատմամբ բռնությունից խուսափելու համար։ Այս կապակցությամբ մենք աջակցում ենք ԵԱՀԿ գործող նախագահի անձնական ներկայացուցիչ Անջեյ Կասպրշիկի հայտարարությանը, որում նա կոչ է արել խստորեն պահպանել հրադադարի ռեժիմը Զատկի ու Նովրուզի տոներին։ Մենք կողմերին կոչ ենք անում այդ տոները խաղաղ անցկացնելու համար պայմաններ ստեղծել», — գրված է տեքստում։
Հաղորդագրության մեջ նշված է նաև, որ համանախագահները ԵԱՀԿ-ում գերմանական նախագահության աջակցությամբ կողմերի հետ կշարունակեն ծրագրեր իրականացնել` ուղղված կարգավորմանն ու բռնության նվազմանը, ինչպես նաև մարդասիրական կապեր հաստատելուն։
