ԵՐԵՎԱՆ, 21 մարտի-Sputnik. Ժամեր առաջ Ռոզա Հարությունյանին տեղափոխել են Երևանի «Էրեբունի» բժշկական կենտրոն` դեմքի և վերին վերջույթների վնասվածքներով։ Նրան վիրահատել են, այժմ կինը գտնվում է վերակենդանացման բաժանմունքում, շնչում է արհեստական սարքի միջոցով, հայտնեց «Էրեբունի» ԲԿ մամուլի խոսնակ Շուշան Հունանյանը։
Վիրահատությունը տևել է գրեթե 4 ժամ, վիրահատարանում միաժամանակ աշխատել է վիրահատական մի քանի խումբ` միկրովիրաբուժական, պլաստիկ և դիմածնոտային: «Էրեբունի» ԲԿ առաջատար բժիշկներ Արա Հայրապետյանը, Արտյոմ Իկիլիկյանը և Արամ Բորոյանը նախ վիրաբուժական մշակում են կատարել, հատուկ իմպլանտի միջոցով վերականգնել են աջ այտոսկրի կոտրվածքը: Վիրահատական մշակման են ենթարկվել նաև ձեռքերը, որոնք ևս վնասված են եղել: Իսկ աջ կողմի այտի և քթի հատվածում մաշկի վնասվածքը կվերականգնվի հաջորդ վիրահատության ընթացքում, որը նախատեսվում է իրականացնել մի քանի շաբաթ անց:
Նշենք, որ նախնական տեղեկություններով` կինն իր երկհարկանի տան նկուղային հարկում փորձել է դույլը վերցնել, որպեսզի գոմ մտնի ու կով կթի։ Հենց այդ ժամանակ էլ հարձակվել է գայլը։
Խաչիկ գյուղում վիրավոր կնոջ հարևանները հայտնաբերել են կնոջ վրա հարձակված գայլին, որին վնասազերծել են շները։
